ନୂଆଦିଲ୍ଲୀ: ମଲ୍ଲଯୋଦ୍ଧା ସାଗର ଧନକଡ଼ଙ୍କ ଅପହରଣ ଓ ହତ୍ୟା ମାମଲାରେ ଦୁଇଟି ଅଲିମ୍ପିକ୍ସ ପଦକ ହାସଲ କରିଥିବା ସୁଶୀଲ କୁମାରଙ୍କୁ ପୁଲିସ୍ ମୁଖ୍ୟ ଅଭିଯୁକ୍ତ ଦର୍ଶାଇଛି। ଏବେ ସୁଶୀଲ ପୁଲିସ ଜିମାରେ ରହିଥିବାବେଳେ ଜେରାର ସମ୍ମୁଖୀନ ହେଉଛନ୍ତି। ବିଚାର ପରେ ସୁଶୀଲ ଦୋଷୀ ନା ନିର୍ଦୋଷ ତାହା ଜଣାପଡ଼ିବ। ହେଲେ ଏହା ପୂର୍ବରୁ ଗଣମାଧ୍ୟମ ସୁଶୀଲ କୁମାରଙ୍କୁ ଖଳନାୟକ ଭାବେ ଦର୍ଶାଇବାରେ ଲାଗିଛି।
ସୁଶୀଲଙ୍କୁ ନେଇ ବିଭ୍ରାନ୍ତିକର ଓ ସତ୍ୟତା ନଥିବାର କାହାଣୀ ଗଣମାଧ୍ୟମ ପ୍ରଚାର କରୁଛି। ସାରାବିଶ୍ୱରେ ଭାରତର ଗୌରବ ମଣ୍ଡନ କରିଥିବା ଜଣେ କ୍ରୀଡ଼ାବିତ୍ଙ୍କ ପ୍ରତି ଏପରି ବ୍ୟବହାର ଗ୍ରହଣୀୟ ନୁହେଁ। ଏହାକୁ ତୁରନ୍ତ ବନ୍ଦକରିବା ଲାଗି ଗଣମାଧ୍ୟମକୁ ନିର୍ଦେଶ ଦେବା ପାଇଁ ଦିଲ୍ଲୀ ହାଇକୋର୍ଟରେ ଆବେଦନ କରିଥିଲେ ଜଣେ ଆଇନ୍ ଛାତ୍ର। ଜଷ୍ଟିସ୍ ଡି.ଏନ୍. ପଟେଲ ଓ ଜଷ୍ଟିସ ଜ୍ୟୋତି ସିଂହଙ୍କୁ ନେଇ ଖଣ୍ଡପୀଠ ଆବେଦନକୁ ଗ୍ରହଣ କରିନଥିବା ବେଳେ ଶୁଣାଣି ପାଇଁ ଶୁକ୍ରବାର ମନା କରିଦେଇଛନ୍ତି। ଯାହା ଫଳରେ ସୁଶୀଲଙ୍କୁ ଆଉ ଏକ ବଡ ଧକ୍କା ଲାଗିଛି। ଅନ୍ୟପକ୍ଷରେ ସାଗର ଧନକଡଙ୍କ ଅପହରଣ ଓ ହତ୍ୟା ମାମଲାରେ ଦିଲ୍ଲୀ ପୁଲିସ କ୍ରାଇମ୍ବ୍ରାଞ୍ଚ ଶୁକ୍ରବାର ଆଉ ଜଣେ ମଲ୍ଲଯୋଦ୍ଧା ରୋହିତଙ୍କୁ ଗିରିଫ କରିଛି। ଛତ୍ରସାଲ ଷ୍ଟାଡ଼ିୟମରେ ଘଟିଥିବା ଗଣ୍ଡଗୋଳ ଓ ହତ୍ୟା ଘଟଣାରେ ରୋହିତ ସମ୍ପୃକ୍ତ ଥିବା ନେଇ ଦିଲ୍ଲୀ ପୁଲିସ କ୍ରାଇମ୍ବ୍ରାଞ୍ଚ ତଦନ୍ତରୁ ଜାଣିବାକୁ ପାଇଥିଲା।
