କଟକ : ମଙ୍ଗଳବାର ଠାରୁ ଦୁଇ ଦିନିଆ ସର୍ବଭାରତୀୟ ସାଧାରଣ ଧର୍ମଘଟ ଡାକରା ଦିଆଯାଇଛି। ବିଭିନ୍ନ କେନ୍ଦ୍ରୀୟ ଟ୍ରେଡ ୟୁନିୟନ ଏହି ବନ୍ଦ ଡାକରା ଦେଇଛି। ବନ୍ଦ ଡାକରା ଆନ୍ଦୋଳନରେ ୨୦କୋଟି କର୍ମଚାରୀ ସାମିଲ ହୋଇଥିବା ଟ୍ରେଡ ୟୁନିୟନ ପକ୍ଷରୁ ସୂଚନା ମିଳିଛି। ସରକାରଙ୍କ କର୍ମଚାରୀ ବିରୋଧୀ ନୀତିକୁ ବିରୋଧ କରି ଏହି ବନ୍ଦ ଡାକରା ଦିଆଯାଇଛି। ବନ୍ଦ ଡାକରା ଫଳରେ ବିଭିନ୍ନ ସ୍କୁଲ, କଲେଜ ବନ୍ଦ ରହିଛି। ଆନ୍ଦୋଳନରେ ଟେଲିକମ, ସ୍ବାସ୍ଥ୍ୟ, ଶିକ୍ଷା, କୋଇଲା, ଷ୍ଟିଲ, ବିଦ୍ୟୁତ, ବ୍ୟାଙ୍କ, ବୀମା ଓ ପରିବହନ ସେକ୍ଟରର କର୍ମଚାରୀମାନେ ସମର୍ଥନ କରୁଥିବା ସୂଚନା ମିଳିଛି। ଟ୍ରେଡ ୟୁନିୟନର ଆନ୍ଦୋଳନ ଯୋଗୁଁ ଦେଶରେ ବିଭିନ୍ନ ସେବା ପ୍ରଭାବିତ ହେବାର ଆଶଙ୍କା ରହିଛି। ଆନ୍ଦୋଳନ ଯୋଗୁଁ ବିଭିନ୍ନ ସ୍ଥାନରେ ରେଳରୋକ କରାଯାଇଛି। ଶ୍ରମିକ ସଂଘର କର୍ମଚାରୀମାନେ ବିଭିନ୍ନ ସ୍ଥାନରେ ପିକେଟିଂ କରୁଥିବାର ଦେଖାଯାଇଛି।
ସକାଳ ୬ଟାରୁ ଆନ୍ଦୋଳନକାରୀମାନେ ବସ, ରେଳ, ଟ୍ୟାକ୍ସି, ଅଟୋ ଇତ୍ୟାଦି ଯାନବାହାନ ଚଳାଚଳ ବନ୍ଦ କରି ଦେଇଛନ୍ତି। କେବଳ ଜରୁରୀକାଳୀନ ସେବାଗୁଡିକୁ ଏଥିରୁ ବାଦ ଦିଆଯାଇଛି। ଏହି ଆନ୍ଦୋଳନକୁ ବିଜେପିକୁ ବାଦ ଦେଇ କଂଗ୍ରେସ, ବିଜେଡି ଓ ବାମପନ୍ଥୀ ଦଳଗୁଡିକ ସମର୍ଥନ କରୁଥିବାରୁ ରାଜ୍ୟରେ ବନ୍ଦର ପ୍ରଭାବ ରହିବ ବୋଲି ଆଶଙ୍କା କରାଯାଉଛି।
