ଉଦ୍ଧାର ସମୟରେ କାମୁଡିଲା ନାଗ, ଅବହେଳା ଯୋଗୁଁ ଗଲା ଜୀବନ

ନୂଆଦିଲ୍ଲୀ : ବର୍ଷା ଦିନେ ଅନେକ ସ୍ଥାନରେ ସାପ ନଜର ଆସିଥାନ୍ତି । ବେଳେବେଳେ ସାପ ଘରକୁ ଚାଲିଆସନ୍ତି । ସାପ ଧରିବା ପାଇଁ ସାପ ଧରାଳୀକୁ ଡକାଯାଇଥାଏ । ତେବେ ସାପ ଧରିବା ସମୟରେ ସାପଧରାଳୀକୁ ମଧ୍ୟ ସାପ କାମୁଡିଦେବା ଖବର ଦେଖିବାକୁ ମିଳେ । ଏମିତି ଏକ ଖବର ଏବେ ସାମ୍ନାକୁ ଆସିଛି । ସାମାଜିକ ଗଣମାଧ୍ୟମରେ ଏକ ଭିଡିଓ ଭାଇରାଲ ହେଉଛି ଯେଉଁଥିରେ ସାପଧରାଳୀକୁ ଏକ ନାଗ ସାପ କାମୁଡିଦେଉଛି ।

ଘଟଣାଟି ମହାରାଷ୍ଟ୍ରର ଗୋନ୍ଦିଆ ସହରର । ଏଠାରେ ଏକ ଘରେ ନାଗ ସାପ ପଶିଯାଇଥିଲା । ଜଣେ ମହିଳା ରୋଷେଇ ଘରକୁ ଯିବା ସମୟରେ ସାପଟି ଫଣା ମେଲାଇ ବସିଥିଲା । ଏହା ପରେ ସାପଧରାଳୀଙ୍କୁ ଡକାଯାଇଥିଲା । ଉଦ୍ଧାର ସମୟରେ ଲାଇଭ୍ ଭିଡିଓ କରାଯାଉଥିଲା, ଏହି ସମୟରେ ସାପଟି ଉଦ୍ଧାରକାରୀଙ୍କୁ କାମୁଡିଦେଇଥିଲା । ଭିଡିଓଟି ଏବେ ସାମାଜିକ ଗଣମାଧ୍ୟମରେ ଭାଇରାଲ ହେଉଛି ।

snake catcher bitten by cobra#viralvideo #Cobra #Viralnewsvibes pic.twitter.com/eSixMQyMF7

— Viral News Vibes (@viralnewsvibes) August 7, 2024

ନାଗ ସାପର ଲମ୍ବ ପ୍ରାୟ ୬ ଫୁଟ ହେବ । ସାପ ଉଦ୍ଧାରକାରୀ ସୁନିଲଙ୍କୁ ସାପ ଚୋଟ ମାରିଥିଲା । ସୁନିଲ ଏହାକୁ ଗୁରୁତର ସହ ନନେଇ ଅବହେଳା କରି ବିଳମ୍ବ କରିଦେଲେ । ଧିରେ ଧିରେ ସ୍ବାସ୍ଥ୍ୟାବସ୍ଥା ବିଗିଡିବାରୁ ତାଙ୍କୁ ମେଡିକାଲ ନିଆଯାଇଥିଲା । କିନ୍ତୁ ଚିକିତ୍ସା ସମୟରେ ତାଙ୍କର ମୃତ୍ୟୁ ହୋଇଥିଲା ।