ମୁମ୍ବଇ : ଭାରତୀୟ କ୍ରିକେଟର୍ ତଥା ରାଜନେତା ନବଜୋତ୍ ସିଂହ ସିଦ୍ଧୁ ‘ଦି କପିଲ ଶର୍ମା ଶୋ’କୁ ପ୍ରତ୍ୟାବର୍ତ୍ତନ କରିପାରନ୍ତି। ପୁଲୱାମା ଆକ୍ରମଣ ପରେ କଡ଼ା ସମାଲୋଚନାର ଶିକାର ହୋଇ ଶୋ’ରୁ ବାଦ୍ ପଡ଼ିଥିବା ସିଦ୍ଧୁଙ୍କୁ ପୁଣି ଥରେ ଫେରାଇ ଆଣିବା ପାଇଁ ଚାହୁଁଛନ୍ତି ଶୋ’ର ପ୍ରଯୋଜକ ତଥା ଅଭିନେତା ସଲମାନ୍ ଖାନ୍।
ବିଶେଷ ସୂତ୍ରରୁ ପ୍ରକାଶ ଯେ, ସୋନି ଟିଭି ଏବଂ ସଲମାନ ଏହି ମାମଲା ଥଣ୍ଡା ହେବାପାଇଁ ଅପେକ୍ଷା କରିଛନ୍ତି। ଏହା ପରେ ସେ ସିଦ୍ଧୁଙ୍କୁ ପୁଣିଥରେ ଶୋ’କୁ ଆଣିବେ। ଶୋ’ରୁ ସିଦ୍ଧୁଙ୍କୁ ବାଦ ଦେବା ପରେ ତାଙ୍କ ସ୍ଥାନରେ ଅଭିନେତ୍ରୀ ଅର୍ଚ୍ଚନା ପୁରନ୍ ସିଂହଙ୍କୁ ଅଣାଯାଇଥିଲା। ଶୋ’ରେ ଅର୍ଚ୍ଚନାଙ୍କୁ ସିଦ୍ଧୁଙ୍କ ସ୍ଥାନରେ ନେବା କଥା ସୋନି ଟିଭି ନିଜ ଅଫିସିଆଲ୍ ଟ୍ୱିଟର୍ ପେଜରେ ପ୍ରକାଶ କରିଥିଲା। ଏବେ ମଧ୍ୟ ଅର୍ଚ୍ଚନାଙ୍କ ସହ ଶୋ’ର ଏପିସୋଡ଼୍ ସୁଟିଂ କରାଯାଉଛି। ମାତ୍ର ଶୋ’ରୁ ସିଦ୍ଧୁଙ୍କୁ ବାହାର କରିବା କଥା ଚ୍ୟାନେଲ୍ ଆନୁଷ୍ଠାନିକ ଭାବେ ଘୋଷଣା କରିନଥିଲା। ଏନେଇ କେତେକ ଟ୍ୱିଟର୍ ବ୍ୟବହାରକାରୀ ଅସନ୍ତୋଷ ପ୍ରକାଶ କରି କହିଥିଲେ, ‘‘ସିଦ୍ଧୁଙ୍କୁ ସୋନି ଟିଭି ‘ଦି କପିଲ୍ ଶର୍ମା ଶୋ’ରୁ ବାହାର କରିଛି କି ନାହିଁ ତାହା ସାର୍ବଜନୀନ କରୁ। ଯଦି ଚ୍ୟାନେଲ୍ ଏହା ସ୍ପଷ୍ଟ ନକରିବ ତେବେ ଆମେ ଏହି ଚ୍ୟାନେଲକୁ ଅନସବସ୍କ୍ରାଇବ୍ କରିଦେବୁ’’।
ଉଲ୍ଲେଖଯୋଗ୍ୟ, ପୁଲୱାମାରେ ଆତଙ୍କବାଦୀ ଆକ୍ରମଣ ପରେ ସିଦ୍ଧୁଙ୍କ ବିବାଦୀୟ ମନ୍ତବ୍ୟକୁ ନେଇ ତାଙ୍କ ବିରୁଦ୍ଧରେ କ’ଣ ପଦକ୍ଷେପ ନିଆଯିବ ଏନେଇ ଚ୍ୟାନେଲ୍ କିଛି ସ୍ଥିର କରି ନଥିଲା। ଏହି ସମୟରେ ସଲମାନ୍ ସିଦ୍ଧୁଙ୍କୁ ଶୋ’ରୁ ବାହାର କରିବା ପାଇଁ ନିଷ୍ପତ୍ତି ନେଇଥିଲେ। କାରଣ ଶୋ’ର ଭଲ ଚାହିଦା ଥିବା ଯୋଗୁଁ ପ୍ରଯୋଜକ ହିସାବରେ ସଲମାନ ଶୋ’କୁ କୌଣସି କ୍ଷତି ପହଞ୍ଚାଇବାକୁ ଚାହୁଁନଥିଲେ।
ଅଭିନେତ୍ରୀ ଅର୍ଚ୍ଚନା ପୁରନ୍ ସିଂହ ମାତ୍ର କିଛି ଏପିସୋଡ଼୍ ପାଇଁ ଚୁକ୍ତି କରିଛନ୍ତି ଓ କିଛିଦିନ ମଧ୍ୟରେ ସିଦ୍ଧୁ ପୁଣି ଶୋ’କୁ ଫେରିବେ ବୋଲି ଖବର ମିଳିଛି।
