ତ୍ରିରଙ୍ଗା ଟିଭିର ୨୦୦ କର୍ମଚାରୀଙ୍କୁ ଦରମା ନଦେଇ ଛଟେଇ କରିଛନ୍ତି ସିବଲ ଓ ତାଙ୍କ ପତ୍ନୀ : ବର୍ଖା ଦତ୍ତ

ନୂଆଦିଲ୍ଳୀ : ବରିଷ୍ଠ ସାମ୍ବାଦିକା ବର୍ଖା ଦତ୍ତ ବୁଧବାର ବରିଷ୍ଠ କଂଗ୍ରେସ ନେତା କପିଲ ସିବଲ ଓ ତାଙ୍କ ପତ୍ନୀ ପ୍ରମିଳାଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ପ୍ରମିଳାଙ୍କ ଦ୍ୱାରା ପରିଚାଳିତ ତ୍ରିରଙ୍ଗା ଟିଭିର ୨୦୦ କର୍ମଚାରୀ (ସାମ୍ବାଦିକଙ୍କୁ) ଦରମା ନଦେଇ ଛଟେଇ କରାଯାଇଥିବା ସେ ଅଭିଯୋଗ କରିଛନ୍ତି। ଏପରିକି ଦରମା ପାଇଁ ଅଫିସରେ ବିରୋଧ ପ୍ରଦର୍ଶନ କରୁଥିବା ସାମ୍ବାଦିକଙ୍କୁ ଗୁଣ୍ଡା ଲଗେଇ ବାହାର କରାଯାଇଥିବା ବର୍ଖା ଟ୍ୱିଟ୍‍ ଯୋଗେ କହିଛନ୍ତି।
ଅପରପକ୍ଷରେ ସିବଲଙ୍କ ପତ୍ନୀ ପ୍ରମିଳା ଏହି ଅଭିଯୋଗକୁ ଖଣ୍ଡନ କରିଛନ୍ତି। ସିବଲ କହିଛନ୍ତି ଯେ ବର୍ଖା ଦତ୍ତଙ୍କ ସମେତ ଅନ୍ୟ ସମସ୍ତ କର୍ମଚାରୀଙ୍କୁ ଜୁନ ମାସ ପର୍ଯ୍ୟନ୍ତ ଦରମା ପ୍ରଦାନ କରାଯାଇଛି। କମ୍ପାନୀର ଚୁକ୍ତିପତ୍ର (କଣ୍ଟ୍ରାକ୍ଟ) ଶେଷ ହେବା ପରେ ସେମାନଙ୍କୁ ପୁନଃ କାର୍ଯ୍ୟରେ ରଖାଯାଇନାହିଁ। ବର୍ଖା ଜୁଲାଇ ୧୫ରୁ ଏନେଇ ଅନେକ ଟ୍ୱିଟ୍‍ କରିଛନ୍ତି। ସେ ଟ୍ୱିଟ୍‍ ଯୋଗେ ଅଭିଯୋଗ କରିଛନ୍ତି ଯେ ତ୍ରିରଙ୍ଗା ଟିଭିରେ ଅନ୍ୟୁନ ୨ ବର୍ଷ କାମ କରିବାକୁ ପ୍ରତିଶ୍ରୁତି ଦିଆଯାଇଥିଲା। ମାତ୍ର ବର୍ଷେ ପରେ କୌଣସି ନୋଟିସ ଓ କ୍ଷତିପୂରଣ ନଦେଇ ୨୦୦ରୁ ଊର୍ଦ୍ଧ୍ବ କର୍ମଚାରୀଙ୍କୁ ଛଟେଇ କରାଯାଇଛି। ସିବଲଙ୍କ ପତ୍ନୀ ପ୍ରମିଳା କହିଛନ୍ତି ଯେ ଚୁକ୍ତିପତ୍ର ବର୍ଷେ ପାଇଁ ଥିଲା। ଚୁକ୍ତି ଶେଷ ହୋଇଛି ତେଣୁ କୌଣସି ନୋଟିସର ଆବଶ୍ୟକତା ନାହିଁ।