ନୂଆଦିଲ୍ଲୀ: କେନ୍ଦ୍ର ସରକାର, ରାଜ୍ୟ ସରକାର ଓ କେନ୍ଦ୍ରଶାସିତ ଅଞ୍ଚଳ ସରକାରରେ କାର୍ଯ୍ୟରତ ମନ୍ତ୍ରୀମାନଙ୍କ ମଧ୍ୟରୁ ୪୭%ଙ୍କ ବିରୋଧରେ ଫୌଜଦାରୀ ମାମଲା ରହିଛି। ଆସୋସିଏସନ୍ ଫର ଡେମୋକ୍ରାଟିକ ରିଫର୍ମ (ଏଡିଆର) ରିପୋର୍ଟ ଅନୁଯାୟୀ କେନ୍ଦ୍ର, ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ସରକାରର ମନ୍ତ୍ରିମଣ୍ଡଳରେ ମୋଟ୍ ୬୪୩ ଜଣ ମନ୍ତ୍ରୀ କାର୍ଯ୍ୟରତ ଅଛନ୍ତି।
ଏହି ମନ୍ତ୍ରୀମାନଙ୍କ ମଧ୍ୟରୁ ୩୦୨ ଜଣଙ୍କ ବିରୋଧରେ ଫୌଜଦାରୀ ମାମଲା ବିଚାରାଧୀନ ରହିଛି। ଏପରି କି ୧୭୪ଜଣ ବିରୋଧରେ ହତ୍ୟା, ଅପରହଣ, ମହିଳା ବିରୋଧୀ ହିଂସା ଭଳି ଗୁରୁତର ଫୌଜଦାରୀ ମାମଲା ରହିଛି। ନିର୍ବାଚନ ସମୟରେ ମନ୍ତ୍ରୀମାନେ ଦାଖଲ କରିଥିବା ସତ୍ୟପାଠକୁ ଆଧାର କରି ଏଡିଆର ଏହି ରିପୋର୍ଟ ପ୍ରକାଶ କରିଛି। ଦଳୀୟ ଭିତ୍ତିରେ ବିଜେପିରେ ସର୍ବାଧିକ ୧୩୬ ଜଣ ମନ୍ତ୍ରୀଙ୍କ ବିରୋଧରେ ଫୌଜଦାରୀ ମାମଲା ରହିଛି। ବିଜେପିର ମୋଟ ୩୩୬ଜଣ ମନ୍ତ୍ରୀଙ୍କ ମଧ୍ୟରୁ ୪୦%ଙ୍କ ବିରୋଧରେ ଫୌଜଦାରୀ ମାମଲା ରହିଛି। କଂଗ୍ରେସର ୬୧ଜଣ ମନ୍ତ୍ରୀଙ୍କ ମଧ୍ୟରୁ ୪୫ ଜଣଙ୍କ ନାମରେ ଫୌଜଦାରୀ ମାମଲା ରହିଛି। କେନ୍ଦ୍ର ସରକାରରେ ଥିବା ୭୨ଜଣଙ୍କ ମନ୍ତ୍ରୀଙ୍କ ମଧ୍ୟରୁ ୨୯ଜଣଙ୍କ ବିରୋଧରେ ଫୌଜଦାରୀ ମାମଲା ରହିଛି। ତେବେ ଆନ୍ଧ୍ରପ୍ରଦେଶ, ତାମିଲନାଡୁ, ବିହାର, ଓଡ଼ିଶା, ମହାରାଷ୍ଟ୍ର, କର୍ଣ୍ଣାଟକ, ପଞ୍ଜାବ, ତେଲଙ୍ଗାନା, ହିମାଚଳ ପ୍ରଦେଶ, ଦିଲ୍ଲୀ ଓ ପୁଡୁଚେରୀ ଭଳି ସରକାରରେ କାର୍ଯ୍ୟରତ ମନ୍ତ୍ରୀଙ୍କ ମଧ୍ୟରୁ ୬୦%ଙ୍କ ବିରୋଧରେ ଫୌଜଦାରୀ ମାମଲା ରହିଛି।
