ଫୁଲବାଣୀ: ଜିଲା ପ୍ରଶାସନର ବାରମ୍ବାର ନିର୍ଦ୍ଦେଶ ଓ ଅନୁରୋଧ ସତ୍ତେ୍ୱ ଭାରତୀୟ ଷ୍ଟେଟବ୍ୟାଙ୍କର କିଛି ଅଧିକାରୀ ଓ କର୍ମଚାରୀ ନିର୍ଦ୍ଦେଶକୁ ଅବମାନନା କରି ଭୁବନେଶ୍ୱର, କଟକ, ବ୍ରହ୍ମପୁର ଭଳି ହଟସ୍ପଟ ସ୍ଥାନକୁ ଯାଇ ସଂକ୍ରମିତ ହେବା ଯୋଗୁଁ ବ୍ୟାଙ୍କର ଆଞ୍ଚଳିତ କାର୍ଯ୍ୟାଳୟ ସମେତ ଜିଲାର ୫ଟି ଶାଖା ସିଲ୍ କରାଯାଇଛି। ଏହି ୫ଟି ଶାଖା ହେଲା ଫୁଲବାଣୀ ମୁଖ୍ୟ, ବଜାର ଶାଖା, ଦାରିଙ୍ଗିବାଡି, ଚକାପାଦ ଓ ଜି.ଉଦୟଗିରି ଶାଖା।
ମିଳିଥିବା ସୂଚନା ଅନୁଯାୟୀ, ଏଲଡିଏମଙ୍କ ସମେତ ଚକାପାଦ, ଦାରିଙ୍ଗିବାଡି ଓ ଜି ଉଦୟଗିରି ଶାଖାର ଅଧିକାରୀମାନେ ଭୁନେଶ୍ୱରରେ ସଂକ୍ରମିତ ଚିହ୍ନଟ ହୋଇଛନ୍ତି। ତେଣୁ ଉପରୋକ୍ତ ୫ଟି ଶାଖାକୁ ୭ ଦିନ ପାଇଁ ବନ୍ଦ କରି ଦିଆଯାଇଛି। ଜିଲ୍ଲାର ପ୍ରାୟ ସମସ୍ତ ସରକାରୀ ଓ ବେସରକାରୀ କାର୍ଯ୍ୟାଳୟ, ସଂସ୍ଥା ସମେତ ଲକ୍ଷାଧିକ ଗ୍ରାହକଙ୍କ ଏହି ବ୍ୟାଙ୍କରେ ଆକାଉଣ୍ଟ ଥିବାରୁ ୭ ଦିନ ପର୍ଯ୍ୟନ୍ତ ଆଉ ଦେଣ ନେଣ କାର୍ଯ୍ୟ ହୋଇ ପାରିବ ନାହିଁ। ଯାହାକୁ ନେଇ ଗ୍ରାହକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଏଥିସହିତ ରାଇକିଆସ୍ଥିତ ଷ୍ଟେଟବ୍ୟାଙ୍କର କର୍ମଚାରୀମାନଙ୍କୁ ହୋମ୍ କ୍ୱାରେଣ୍ଟାଇନରେ ରହିବା ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି। ଅନ୍ୟପକ୍ଷରେ ଜିଲାର ଉପରୋକ୍ତ ୫ଟି ଶାଖାକୁ ସିଲ୍ କରାଯିବା ସହିତ ସାନିଟାଇଜ୍ କରାଯାଇଥିବା ବେଳେ କେତେକ କର୍ମଚାରୀମାନ ହୋମ୍ କ୍ୱାରେଣ୍ଟାଇନରେ ନ ରହି ଖୋଲାଖୋଲି ଭାବେ ବୁଲୁଥିବାରୁ ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ସୂଚନାଯୋଗ୍ୟ, ଜିଲ୍ଲାପାଳ ଗତ ୮ ତାରିଖରେ ଜିଲ୍ଲାର ସମସ୍ତ ସରକାରୀ ବିଭାଗ, ବ୍ୟାଙ୍କ ଆଦିକୁ ଚିଠି କରି କୌଣସି ସରକାରୀ କର୍ମଚାରୀ ଜିଲ୍ଲା ବାହାରକୁ ବିନା ଅନୁମତିରେ ଯିବା ଉପରେ ପ୍ରତିବନ୍ଧକ ଲଗାଇଥିଲେ। ଯଦି କେହି ଏହାର ଅବମାନନା କରନ୍ତି ତେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାବନୀ ଦେଇଥିଲେ। ତଥାପି ଅନେକ ବ୍ୟାଙ୍କ ଅଧିକାରୀ ଓ କର୍ମଚାରୀ ଏହି ନିର୍ଦ୍ଦେଶକୁ ଖୋଲାଖୋଲି ଭାବେ ଉଲ୍ଲଂଘନ କରି ଛୁଟି ଦିନ ମାନଙ୍କରେ ବିଭିନ୍ନ ହଟସ୍ପଟ ସ୍ଥାନକୁ ଯାଇ ଛୁଟି ସରିଲେ ଫେରୁଥିବା ଅଭିଯୋଗ ହେଇ ଆସୁଛିା ଯାହାର ଫଳ ସ୍ୱରୁପ ଆଜି ଜିଲ୍ଲାବାସୀଙ୍କୁ ବ୍ୟାଙ୍କ ସେବାରୁ ବଞ୍ଚିତ ହେବାକୁ ପଡିଛି ବୋଲି ସାଧାରଣରେ ସମାଲୋଚନା ହେଉଛିିା
Comments are closed.