ସାକ୍ଷିଗୋପାଳ: ସତ୍ୟବାଦୀ ବ୍ଲକ ଅନ୍ତର୍ଗତ ଶ୍ରୀରାମଚନ୍ଦ୍ରପୁର ମଠ ସାହି ତାଲିମକେନ୍ଦ୍ରରେ ନିର୍ମିତ ପଟ୍ଟଚିତ୍ର ଅଯୋଧ୍ୟା ଶ୍ରୀରାମ ଲାଲାଙ୍କ ମନ୍ଦିରରେ ଶୋଭାପାଇବ। ତାଲିମକେନ୍ଦ୍ରର ଶିକ୍ଷକ ନୀଳମଣି ଜେନା ଏହି ପଟ୍ଟଚିତ୍ର ପ୍ରସ୍ତୁତ କରିଛନ୍ତି। ୮ ଫୁଟ ଲମ୍ବ ଓ ୩.୪ ଫୁଟ ଓସାର ବିଶିଷ୍ଟ ଏହି ପଟ୍ଟଚିତ୍ରରେ ପ୍ରଭୁ ଶ୍ରୀରାମଙ୍କ ଜନ୍ମବୃତ୍ତାନ୍ତ, ପିତୃସତ୍ୟ ପାଳନ, ବନବାସ ଗମନ, ସୀତାହରଣ, ବାନରସେନା ଓ ହନୁମାନଙ୍କ ମିତ୍ରତା, ଲଙ୍କା ବିଜୟ, ଅଯୋଧ୍ୟା ପ୍ରତ୍ୟାବର୍ତ୍ତନ ଓ ଶ୍ରୀରାମଙ୍କ ରାଜ୍ୟାଭିଷେକ, ରାମରାଜ୍ୟ ଆଦି ବିଷୟବସ୍ତୁ ସ୍ଥାନିତ ହୋଇଛି ।
ଏହା ସହିତ ଭଗବାନଙ୍କ ଦଶାବତାର କାହାଣୀ, ଭବ୍ୟ ଶ୍ରୀରାମ ମନ୍ଦିର, ଯଜ୍ଞଶାଳା ଓ ପ୍ରତିଷ୍ଠା ଦିବସ ସ୍ଥାନ ପାଇଛି। ଏହାର ପ୍ରସ୍ତୁତି ନିମନ୍ତେ ୩୦ ଦିନ ସମୟ ଲାଗିଛି। ବିଶ୍ୱନାଥ ସେଠୀ ଓ ବିଶ୍ୱରଞ୍ଜନ ଜେନାଙ୍କ ସହଯୋଗରେ ତାଲିମକେନ୍ଦ୍ରର ଛାତ୍ରୀ ରୀତାଞ୍ଜଳି ରାଉତ, ପୁଷ୍ପଲତା ଜେନା, ମାହାଲି ଦାସ, ରଶ୍ମିତା ପରିଡା ଓ ସଂଯୁକ୍ତା ରାଉତରାୟ ପ୍ରମୁଖ ଏହି ପଟ୍ଟଚିତ୍ର ପ୍ରସ୍ତୁତ କରିଥିଲେ। ବିଜେପି ରାଷ୍ଟୀୟ ପ୍ରବକ୍ତା ଡ. ସମ୍ବିତ ପାତ୍ର ଏହି ପଟ୍ଟଚିତ୍ରକୁ ଅଯୋଧ୍ୟା ନେବେ ବୋଲି ଶିକ୍ଷକ ଶ୍ରୀଯୁକ୍ତ ଜେନା ପ୍ରକାଶ କରିଥିଲେ।
Comments are closed.