ଘାସ ବୁଦା ଭିତରେ ଲୁଚି ଶୋଇଥିଲା ସୈଫଙ୍କ ଆକ୍ରମଣକାରୀ, ବାଂଲାଦେଶୀ ସନ୍ଦେହ

ସମାଜ ଡିଜିଟାଲ ଡେସ୍କ: ଅଭିନେତା ସୈଫ ଅଲି ଖାନଙ୍କୁ ଆକ୍ରମଣ କରିଥିବା ଅଭିଯୁକ୍ତକୁ ମୁମ୍ବଇ ପୁଲିସ ରବିବାର ଗିରଫ କରିଛି। ଘଟଣାର ୩ ଦିନ ପରେ ପୁଲିସ ଥାଣେରୁ ଅଭିଯୁକ୍ତକୁ ଧରିଛି। ଯାହାର ନାଁ ହେଉଛି ମହମ୍ମଦ ସଜ୍ଜାଦ। ତେବେ ସେ ନିଜ ନାମ ବଦଳାଇ ବିଜୟ ଦାସ ନାଁରେ ଥାଣେରେ ଏକ ଶ୍ରମିକ ଶିବିରରେ ରହୁଥିଲା। ଆକ୍ରମଣ ପରେ ସେ ଏହିଠାକୁ ପଳାଇ ଆସିଥିଲା। ଶିବିରଠାରୁ ଅନତି ଦୂରରେ ଏକ ଜଙ୍ଗଲିଆ ସ୍ଥାନରେ ଲୁଚିଥିଲା।  ଧରା ନ ପଡ଼ିବା ଲାଗି ବଡ଼ ବଡ଼ ଘାସ ଥିବା ଏକ ବୁଦା ଭିତରେ ଲୁଚି ସେହିଠାରେ ଶୋଇପଡ଼ିଥିଲା ବୋଲି ପୁଲିସ କହିଛି। ଅଭିଯୁକ୍ତ ଏହି ଅଞ୍ଚଳରେ ଆଗରୁ କାମ କରୁଥିଲା। ତେଣୁ ଆକ୍ରମଣ ପରେ ଲୁଚିବା ପାଇଁ ଏଠାକୁ ଚାଲିଆସିଥିଲା।

ଅଭିଯୁକ୍ତ ଧରାପଡ଼ିବା ପରେ ତା ନାଁ ବିଜୟ ଦାସ ବୋଲି କହିଥିଲା। କିନ୍ତୁ ପରବର୍ତ୍ତୀ ସମୟରେ ତା’ ନାଁ ମହମ୍ମଦ ସଜ୍ଜାଦ ବୋଲି ମାନିଥିଲା। ପୁଲିସ ତା’ର ପ୍ରକୃତ ପରିଚୟ ଖୋଜିବାକୁ ଉଦ୍ୟମ ଚଳାଇଛି। ସେ ବାଂଲାଦେଶୀ ହୋଇଥିବା ସନ୍ଦେହ କରାଯାଉଛି।

ଅନ୍ୟପଟେ ଆରପିଏଫ ଅନ୍ୟ ଜଣେ ସନ୍ଦିଗ୍ଧଙ୍କୁ ଛତିଶଗଡ଼ର ଦୁର୍ଗ ରେଳ ଷ୍ଟେସନରୁ ଶନିବାର ଅଟକ ରଖିଥିଲା। ତା’ର ନାଁ ଆକାଶ କୈଳାସ କନ୍ନୋଜିଆ (୩୧)। ସେ ଜ୍ଞାନେଶ୍ଵରୀ ଏକ୍ସପ୍ରେସରେ ମୁମ୍ବଇରୁ କଲକାତା ଯାଉଥିଲା। ସିସିଟିଭିରେ ଧରାପଡ଼ିଥିବା ଅଭିଯୁକ୍ତର ଫଟୋ ସହିତ ଆକାଶଙ୍କ ଫଟୋ ମେଳ ଖାଉଥିବାରୁ ଆରପିଏଫ ସନ୍ଦେହରେ ତାଙ୍କୁ ଅଟକ ରଖିଥିଲା।