ବଲାଙ୍ଗିର: ବଲାଙ୍ଗିର ଜିଲା ଦେଓଗାଁ ବ୍ଲକ କୁବୁରିମହୁଲ ଠାରୁ ବରଘାଟୀ ରାସ୍ତା ନିର୍ମାଣରେ ଅନେକ ଅନିୟମିତତା ହୋଇଥିବା ଗାଁ ଲୋକେ ଅଭିଯୋଗ କରିଛନ୍ତି। ୧୦ କିମି ରାସ୍ତା ନିର୍ମାଣ କରିବା ବଦଳରେ ସଂପୃକ୍ତ ଠିକାଦାର ଜଣକ ମାତ୍ର କିଛି ମିଟର ରାସ୍ତା ତିଆରି କରି କାମ ସାରିଦେଇଥିବା ଅଭିଯୋଗ କରିଛନ୍ତି।
ଅଭିଯୋଗ ଅନୁସାରେ, ଦେଓଗାଁ ବ୍ଲକ କୁବୁରିମହୁଲଠାରୁ ବରଘାଟ ପର୍ୟ୍ୟନ୍ତ ରାସ୍ତା ନିର୍ମାଣ କରିବା ପାଇଁ ଗ୍ରାମ୍ୟ ଉନ୍ନୟନ ପକ୍ଷରୁ ଅନୁଦାନ ମଞ୍ଜୁର କରାଯାଇଥିଲା। ପ୍ରାୟ ୧୦ କିମି ରାସ୍ତା ନିର୍ମାଣ କରିବା ପାଇଁ ଏହି ଟଙ୍କା ମଞ୍ଜୁର ହୋଇଥିବା ବେଳେ କାମ କରିଥିବା ଠିକାଦାର ଜଣକ ମାତ୍ର ୨୫୦ ମିଟର ରାସ୍ତା ନିର୍ମାଣ କରିଥିବା କୁବୁରିବହୁଲ ଗାଁଲୋକେ ଅଭିଯୋଗ ଆଣିଛନ୍ତି। ପୂର୍ବରୁ ରାସ୍ତାରେ ଲଗାଯାଇଥିବା ଏକ ସୂଚନା ଫଳକରେ ୨୫୦ ମିଟର ଲେଖାଯାଇଥିଲା କିନ୍ତୁ ପରେ ତାକୁ ପରିବର୍ତ୍ତନ କରି ୧୦ କିମି ଲେଖାଯାଇଥିବା ଲୋକେ ଦେଖିବାକୁ ପାଇଥିଲେ। ଫଳରେ ଏହି ରାସ୍ତାକାମରେ ବଡ ଧରଣର ଦୁର୍ନୀତି ହୋଇଥିବା ସେମାନେ ଅଭିଯୋଗ କରିଛନ୍ତି। ଏହି ଘଟଣାର ତଦନ୍ତ କରି ଦୋଷୀ ବିରୋଧରେ ପଦକ୍ଷେପ ଗ୍ରହଣ କରିବା ପାଇଁ ଗୁରୁବାର ଜିଲାପ୍ରଶାସନର ଦ୍ୱାରସ୍ଥ ହୋଇଛନ୍ତି ଗ୍ରାମବାସୀ। ତେବେ ଏହି ଦୁର୍ନୀତିର ତଦନ୍ତ କରି ପଦକ୍ଷେପ ଗ୍ରହଣ କରା ନ ଗଲେ ଆଗାମୀ ଦିନରେ ଗ୍ରାମବାସୀ ଆନ୍ଦୋଳନ କରିବାକୁ ବାଧ୍ୟ ହେବେ ବୋଲି ଚେତାବନୀ ଦେଇଛନ୍ତି।
