ରାୟଗଡ଼ା: ଅନ୍ଧବିଶ୍ବାସର କ୍ରୂରତା ଦେଖିବାକୁ ମିଳିଛି ରାୟଗଡ଼ା ଜିଲାର ବଡ ଆଳୁବାଡି ପଞ୍ଚାୟତର ଘୁରୁସୁବାଡି ଗ୍ରାମରେ। ୨୫ ବର୍ଷ ତଳେ ବାପାଙ୍କୁ ଯେଉଁ ଗୁଣିଗାରେଡ଼ି ପାଇଁ ହତ୍ୟା କରାଯାଇଥିଲା ତାହାର ଏବେ ପୁଣି ପୁନରାବୃତ୍ତି ହୋଇଛି। ଗୁଣି ସନ୍ଦେହରେ ଆଦିବାସୀ ଯୁବକ ରାମରାଓ ଜିଲାକାରା(୪୦)କୁ ଗ୍ରାମବାସୀ ଅତି ଅମାନୁଷିକ ଭାବେ ହତ୍ୟା କରିଛନ୍ତି। ପ୍ରଥମେ ବିଷ ପିଆଇ ଅଚେତ କରିବା ପରେ ନିଅାଁ ଲଗାଇ ଜୀଅନ୍ତା ଜାଳି ଦେଇଛନ୍ତି। ରାମାରାଓଙ୍କ ବାପା ପଦେୟା ଜିଲାକାରାଙ୍କୁ ୨୫ ବର୍ଷ ତଳେ ହୋଇଥିବା ହତ୍ୟା ଘଟଣା ପରେ ଗ୍ରାମବାସୀ ଏବଂ ରାମାରାଓଙ୍କ ପରିବାର ମଧ୍ୟରେ ବୁଝାମଣା ହୋଇଥିଲା। କିନ୍ତୁ ଏହି ବୁଝାମଣାକୁ ବେଖାତିର କରି ଗ୍ରାମବାସୀ ରାମାରାଓଙ୍କୁ ଗୁଣି ସନ୍ଦେହରେ ନିର୍ମମ ଭାବେ ହତ୍ୟା
କରିଛନ୍ତି। ଗତ ୮ ତାରିଖରେ ଏହି ଘଟଣା ଘଟିଥିଲେ ସୁଦ୍ଧା ଗ୍ରାମବାସୀଙ୍କ ଭୟରେ ମୃତକଙ୍କ ପରିବାର ଥାନାକୁ ଖବର କରିନଥିଲେ। ତେବେ ଶେଷରେ ମୃତକଙ୍କ ଭାଇ ଧର୍ମାରାଓ ଜିଲାକାରା ସାହସ ଜୁଟାଇ ଶେଷଖାଲ ଥାନାରେ ଏନେଇ ଅଭିଯୋଗ କରିଥିଲେ। ପୁଲିସ ଏହି ହତ୍ୟା ଅଭିଯୋଗରେ ୧୩ଜଣଙ୍କୁ ଗିରଫ କରି ଅଦାଲତ ଚାଲାଣ କରିଛି। ଗତ ଦୁଇବର୍ଷ ମଧ୍ୟରେ ରାୟଗଡ଼ା ଜିଲାରେ ଗୁଣି ଗାରେଡ଼ି ସନ୍ଦେହରେ ୧୨ ଜଣଙ୍କୁ ହତ୍ୟା କରାଗଲାଣି।
ସୂଚନା ମୁତାବକ ଘୁରୁସୁବାଡି ଗ୍ରାମର ରାମରାଓଙ୍କୁ ଗ୍ରାମବାସୀ ଗୁଣିଆ ସନ୍ଦେହ କରୁଥିଲେ। ୪ ମାସ ତଳେ ଏଥିପାଇଁ ଏକ ଗ୍ରାମସଭା ବସିଥିଲା। ସେଠାରେ ରାମାରାଓଙ୍କୁ ଚେତାବନୀ ଦେଇ ଛାଡ଼ି ଦେଇଥିଲେ। ନିକଟରେ ଗ୍ରାମର ଜଣେ ଶିଶୁର ମୃତ୍ୟୁ ଘଟିଥିଲା। ରାମାରାଓର ଗୁଣିରେ ପିଲାଟି ପ୍ରାଣ ହରାଇଥିବା ଗ୍ରାମବାସୀ ସନ୍ଦେହ କରିଥିଲେ। ଗତ ୮ ତାରିଖ ରାତିରେ ଗ୍ରାମର ୧୫ଜଣ ବ୍ୟକ୍ତି ରାମାରାଓଙ୍କ ଘର ଭିତରକୁ ଧସେଇ ପଶିବା ସହ ତାଙ୍କୁ ବଳପୂର୍ବକ କପା ଚାଷରେ ପ୍ରୟୋଗ ପାଇଁ ଉଦ୍ଦିଷ୍ଟ କୀଟନାଶକ ପିଆଇ ଦେଇଥିଲେ। ରାମାରାଓ ଅଚେତ ହୋଇଯିବା ପରେ ତାକୁ ନିକଟସ୍ଥ ଜଙ୍ଗଲକୁ ଟେକିନେଇ ସେଠାରେ ନିଅାଁ ଲଗାଇ ଜାଳି ଦେଇଥିଲେ। ୧୨ ତାରିଖରେ ମୃତଙ୍କ ଭାଇ ଧର୍ମାରାଓ ଶେଷଖାଲ ଥାନାରେ ଅଭିଯୋଗ କରିବା ପରେ ପୁଲିସ ଗ୍ରାମକୁ ଯାଇ ତଦନ୍ତ କରିଥିଲା। ଏହି ଘଟଣାରେ ପୁଲିସ ଗ୍ରାମର ଘାସି ମଣ୍ଡାଙ୍ଗି, ଅନକେସ ମଣ୍ଡାଙ୍ଗି, ସିଂ ପୁଆଲା, ବୃନ୍ଦାବନ ମଣ୍ଡାଙ୍ଗି, ବିଜୟ ଜିଲାକାରା, ଦିବା ଜିଲାକାରା, ରମେଶ ମଣ୍ଡାଙ୍ଗି, ଜ୍ଞାନେୟ ଜିଲାକାରା, ପ୍ରକାଶ ମଣ୍ଡାଙ୍ଗି, ପ୍ରତାପ ଜିଲାକାରା, ରାଜେଶ ମଣ୍ଡାଙ୍ଗି, ସସେୟ ମଣ୍ଡାଙ୍ଗି, ବମ୍ବେୟ ମଣ୍ଡାଙ୍ଗିଙ୍କୁ ଗିରଫ ପରେ ଅଦାଲତ ଚାଲାଣ କରିଛି। ସେହିପରି ସାଇଣ୍ଟିଫିକ୍ ଦଳ ଘଟଣାସ୍ଥଳରୁ ପାଉଁଶ ସଂଗ୍ରହ କରିବା ସହିତ ଅଧିକ ତଦନ୍ତ ଚଳାଇଥିବା ଶେଷଖାଲ ଥାନା ଅଧିକାରୀ ମୁନି ଆଚାରୀ ସୂଚନା ଦେଇଛନ୍ତି।
ଗୁଣି ସନ୍ଦେହରେ ଯୁବକକୁ ଜିଅନ୍ତା ଜାଳିଦେଲେ
Popular Categories
Previous article
Next article