ନୂଆଦିଲ୍ଲୀ: ସାରା ବିଶ୍ୱରେ ‘କରୋନା’କୁ ନେଇ ଏବେ କୋକୁଆ ଭୟ ଖେଳିଯାଇଛି। ଅନେକ ଦେଶ ଏହା ବିରୁଦ୍ଧରେ ଯୁଦ୍ଧ ମଧ୍ୟ ଜାରି ରଖିଛନ୍ତି। ଅନେକ ଲୋକ ଏହି ଭୂତାଣୁ ଭୟରେ ନିଜକୁ ଘରର ଚାରିକାନ୍ଥ ମଧ୍ୟରେ ବନ୍ଦ କରି ରଖିଛନ୍ତି। ସେଲିବ୍ରିଟି, ରାଜନେତାଙ୍କଠାରୁ ଆରମ୍ଭ କରି ଅନେକ ପ୍ରତିଷ୍ଠିତ ବ୍ୟକ୍ତିମାନେ ମଧ୍ୟ ଘର ଭିତରେ ରହିବାକୁ ଜନସାଧାରଣଙ୍କୁ ପରାମର୍ଶ ଦେଉଛନ୍ତି। ‘କରୋନା’ ଆତଙ୍କ ମଧ୍ୟରେ ବଲିଉଡ଼ ଅଭିନେତା ରଣବୀର ସିଂହ ନିଜ ଚିରାଚରିତ ଢଙ୍ଗରେ ସାମାଜିକ ଗଣମାଧ୍ୟମରେ ଏକ କୌତୁହଳପୂର୍ଣ୍ଣ ଫଟୋ ପୋଷ୍ଟ କରିଛନ୍ତି। ଏଥିରେ ତାଙ୍କୁ ଭୟଙ୍କର ରୂପରେ ଦେଖିବାକୁ ମିଳିଛି। ରଣବୀର ଲମ୍ବା କେଶ ଓ ଭୟଙ୍କର ଆଖି ସହ ନଜର ଆସିଛନ୍ତି। ଏହ ସହ ସେ କ୍ୟାପ୍ସନରେ ଲେଖିଛନ୍ତି, ‘‘ଇଏ ହେଉଛି ମୁଁ, କ୍ବାରେନ୍ଣ୍ଟାଇନ୍ରୁ ବାହାରିବା ପରେ’’।
ସୂଚନାଯୋଗ୍ୟ, ଲୋକେ ଭିନ୍ନ ଭିନ୍ନ ଶୈଳୀରେ ବର୍ତ୍ତମାନ ଘରେ ସମୟ ବିତାଉଛନ୍ତି। ଅପର ପକ୍ଷରେ କିଛି ଲୋକ ଏପରି ମଧ୍ୟ ଅଛନ୍ତି, ଯେଉଁମାନେ ଘରେ ରହି ରହି ବିରକ୍ତ ହୋଇଗଲେଣି କିନ୍ତୁ ନିଜର ଓ ଅନ୍ୟମାନଙ୍କ ସୁରକ୍ଷା ପାଇଁ ଘରେ ସମୟ କାଟୁଛନ୍ତି। ତେବେ ଏଭଳି ପରିସ୍ଥିତିରେ ରଣବୀରଙ୍କ ଏହି ପୋଷ୍ଟ ଲୋକଙ୍କୁ ମନୋରଞ୍ଜନର ଖୋରାକ ଯୋଗାଉଛି କହିଲେ ଅତ୍ୟୁକ୍ତି ହେବନାହିଁ।
