ପୁରୀ: କଟକରେ ଓକିଲଙ୍କୁ ପୁଲିସର ମାଡ ପରେ ଏବେ ପୁରୀରେ ସାଧାରଣ ଜନତାଙ୍କ ସମେତ ଆଇନଜୀବୀ ଓ ଗଣମାଧ୍ୟମ ପ୍ରତିନିଧିଙ୍କୁ ପୁଲିସ ମାଡ ମାରିଥିବା ଅଭିଯୋଗ ହୋଇଛି । ପୁଲିସ ମାଡରେ ଦୁଇ ଜଣ ସାମ୍ବାଦିକ ଗୁରୁତର ହୋଇ କଟକ ବଡମେଡିକାଲକୁ ସ୍ଥାନାନ୍ତରିତ ହୋଇଛନ୍ତି । ସାଧାରଣ ଜନତାଙ୍କ ସମେତ କେତେକ ସାମ୍ବାଦିକ ପୁଲିସ ମାଡରେ ଆହତ ହୋଇଥିବା ଜଣାପଡିଛି । ସମ୍ବାଦିକଙ୍କୁ ପୁଲିସର ଲାଠି ଚାର୍ଜକୁ ବିରୋଧ କରି ଶନିବାର ପୁରୀ ଏସପିଙ୍କ କାର୍ଯ୍ୟାଳୟ ସମ୍ମୁଖରେ କାର୍ଯ୍ୟରତ ସମ୍ବାଦିକମାନେ ଧାରଣାରେ ବସିଛନ୍ତି ।
ସୂଚନାଯୋଗ୍ୟ, ଗତକାଲି ରାତିରେ ପୁରୀ ମେଡିକାଲ ଛକ ନିକଟରେ ଥିବା ଖୁଣ୍ଟିଆ ପେଟ୍ରୋଲ ପମ୍ପରେ ଅପମିଶ୍ରିତ ତେଲ ସହ କମ ପରିମାଣ ତେଲ ଦିଆଯାଉଥିବା ନେଇ ଜଣେ ଗ୍ରାହକ ଅଭିଯୋଗ କରିଥିଲା । ପରେ ଉକ୍ତ ଗ୍ରାହକ ଜଣଙ୍କ ନିଜ ସହଯୋଗୀଙ୍କ ସହ ପେଟ୍ରୋଲ ପମ୍ପରେ ପାଟତୁଣ୍ଡ କରିବା ସହ ଭଙ୍ଗାରୁଜା କରିଥିଲେ । ଖବର ପାଇ ପୁଲିସ ସେଠାରେ ପହଞ୍ଚି ଆଖିବୁଜା ଲାଠି ଚାର୍ଜ କରିଥଲା। ଏଥିରେ ସାଧାରଣ ଜନତାଙ୍କ ସହ କିଛି ଆଇନଜୀବୀ ଆହତ ହୋଇଥିଲେ । ଖବର ସଂଗ୍ରହ କରିବାକୁ ଯାଇଥିବା ସାମ୍ବାଦିକମାନେ ମଧ୍ୟ ପୁଲିସ ଆକ୍ରୋଶରୁ ବର୍ତ୍ତି ପାରି ନଥିଲେ । ସାମ୍ବାଦିକମାନଙ୍କ ପରିଚୟ ପତ୍ର ପିଙ୍ଗି ଦେବା ସହ ସେମାନଙ୍କୁ ମାଡ ମରାଯାଇଥିବା ଅଭିଯୋଗ ହୋଇଛି । ପୁଲିସ ମାଡରେ ସାମ୍ବାଦିକ ପ୍ରଶାନ୍ତ କୁମାର ନାଏକ, ଚିତ୍ତରଞ୍ଜନ ମହାନ୍ତି, ବିକ୍ରମ କୁମାର ଆଚାର୍ଯ୍ୟ ଓ ଜୟଦେବ ପାତ୍ର ଆହତ ହୋଇଛନ୍ତି ।
