ନୂଆଦିଲ୍ଲୀ : ଭାରତରେ ପ୍ରାୟ ୭୦ ଲକ୍ଷ ଡେବିଟ୍ କାର୍ଡ ଏବଂ କ୍ରେଡିଟ୍ କାର୍ଡଧାରୀଙ୍କ ବ୍ୟକ୍ତିଗତ ତଥ୍ୟ ଲିକ୍ ହୋଇଛି। ଡ଼ାର୍କୱେବରେ ଏହି ତଥ୍ୟ ଚୋରି ହୋଇଥିବା ସୂଚନା ମିଳିଛି । ଇଣ୍ଟରନେଟ୍ ସୁରକ୍ଷା ଗବେଷକ ରାଜଶେଖର ରାଜହରିୟା ଏହି ତଥ୍ୟ ଲିକ୍ ହୋଇଥିବା ଦାବି କରିଛନ୍ତି ।
ଲିକ୍ ହୋଇଥିବା ତଥ୍ୟ ମଧ୍ୟରେ କାର୍ଡଧାରୀଙ୍କ ନାମ, ଫୋନ୍ ନମ୍ବର, ଇମେଲ୍ ଆଇଡି, କମ୍ପାନୀ ସୂଚନା, ଆୟ, କାରବାର ଭଳି ସୂଚନା ଅନ୍ତର୍ଭୁକ୍ତ। ଲିକ୍ ହୋଇଥିବା ତଥ୍ୟରେ ପ୍ରାୟ ୫ ଲକ୍ଷ ଗ୍ରାହକଙ୍କ ପାନ୍ ନମ୍ବର ମଧ୍ୟ ରହିଛି। ରାଜହରିଆ କହିଛନ୍ତି ଯେ ଏହା ହୋଇପାରେ ଯେ କେହି ଏହି ତଥ୍ୟକୁ ଡ଼ାର୍କୱେବରେ ବିକ୍ରି କରିଛନ୍ତି ଓ ପରେ ଏହା ସାର୍ବଜନୀନ ହୋଇ ଯାଇଛି ।
ଜଣେ ବ୍ୟକ୍ତିଙ୍କ ଆର୍ଥିକ ତଥ୍ୟ ହେଉଛି ଇଣ୍ଟରନେଟରେ ସବୁଠାରୁ ମହଙ୍ଗା ବୋଲି ସେ ପ୍ରକାଶ କରିଛନ୍ତି। ରିପୋର୍ଟ ହୋଇଛି ଯେ ଡ଼ାର୍କୱେବରେ ଲିକ୍ ହୋଇଥିବା ତଥ୍ୟ ୨୦୧୦ରୁ ୨୦୧୯ ମଧ୍ୟରେ ରହିଛି । ଲିକ୍ ହୋଇଥିବା ତଥ୍ୟରେ ଆକାଉଣ୍ଟ୍ ପ୍ରକାର ଏବଂ ମୋବାଇଲ୍ ଆଲର୍ଟ ଅନ୍ ଅଛି କି ନାହିଁ ସେ ସମ୍ବନ୍ଧରେ ସୂଚନା ରହିଛି। ଡାଟା ଲିକ୍ ବିଷୟରେ ସୂଚନା ପରେ ହ୍ୟାକରମାନେ ଏହି ତଥ୍ୟ ଆଧାରରେ ଲୋକଙ୍କୁ ଠକିବା ପାଇଁ ସୁଯୋଗ ପାଇବେ ବୋଲି ରାଜହରିଆ କହିଛନ୍ତି ।
