ପାରଳାଖେମୁଣ୍ଡି: ସେଲଫି ମାନିଆ ଜଣେ ନାବାଳକ ପାଇଁ ପ୍ରାଣଘାତୀ ସାବ୍ୟସ୍ତ ହୋଇଛି। ଟ୍ରେନ ଉପରେ ଚଢି ସେଲଫି ନେବା ବେଳେ ବଗି ଉପରେ ପ୍ରବାହିତ ବିଦ୍ୟୁତ ତାର ସଂସ୍ପର୍ଶରେ ଆସି ଜଣେ ନାବାଳକ ଜଳି ଯାଇଛନ୍ତି। ଏଭଳି ଅଭାବନୀୟ ଘଟଣା ଘଟିଛି ପାରଳାଖେମୁଣ୍ଡି ରେଳଷ୍ଟେସନରେ।
ମୃତ ନାବାଳକର ନାମ ସୂର୍ୟ୍ୟକୁମାର । ସେଞ୍ଚୁରିଆନ ପବ୍ଲି ସ୍କୁଲର ସେ ନବମ ଶ୍ରେଣୀର ଛାତ୍ର ଥିଲେ। ଆଜି ସନ୍ଧ୍ୟାରେ ସୂର୍ଯ୍ୟକୁମାର ଏବଂ ତାର ୨ଜଣ ସାଙ୍ଗ ରେଳଷ୍ଟେସନକୁ ବୁଲିବାକୁ ଯାଇଥିଲେ। ଷ୍ଟେସନରେ ଛିଡା ହୋଇ ରହିଥିବା ଟ୍ରେନ ବଗି ଉପରକୁ ଚଢିଯାଇ ସେଲଫି ଉଠାଉଥିବା ବେଳେ ବଗି ଉପରେ ପ୍ରବାହିତ ବିଦ୍ୟୁତ ତାର ସଂସ୍ପର୍ଶରେ ଆସି ଯାଇଥିଲା। ଫଳରେ ନାବାଳକ ଜଣକ ସେଠାରେ ଜଳି ଯାଇଥିଲା। ଛିଡା ହୋଇଥିବା ଟ୍ରେନ ବଗିଗୁଡିକ କରୋନା ରୋଗୀଙ୍କ ଆଇସୋଲେସନ ବଗି ଭାବେ ବ୍ୟବହାର କରାଯାଉଥିଲା। ଏହି କାରଣରୁ ଟ୍ରେନ ବଗି ଉପରେ ତାରପୋଲିନ ଘୋଡା ଯାଇଥିଲା। ବିଦ୍ୟୁତ ସଂସ୍ପର୍ଶରେ ସୂର୍ଯ୍ୟକୁମାର ଜଳି ଯିବା ପରେ ପରେ ଟ୍ରେନ ବଗିରେ ଘୋଡା ଯାଇଥିବା ତାର୍ପୋଲିନ ବି ଜଳି ଯାଇଥିଲା। ଘଟଣାସ୍ଥଳକୁ ଅଗ୍ନିଶମ ବିଭାଗ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ଯଦ୍ବାରା ଟ୍ରେନର ବିଶେଷ କିଛି କ୍ଷତି ହୋଇନି। ବର୍ତ୍ତମାନ କୋଭିଡ କଟକଣା କାରଣରୁ ଗୁଣପୁର- ନୌପଡା ରେଳପଥରେ କୌଣସି ଟ୍ରେନ ଚଳାଚଳ କରୁନି। ସୂର୍ଯ୍ୟକୁମାର ସହ ଯାଇଥିବା ଦୁଇଜଣ ସାଙ୍ଗକୁ ରେଳବାଇ ପୁଲିସ ଅଟକ ରଖି ପଚରାଉଚରା କରୁଛି।
Comments are closed.