ପୋଡ଼ିଆ : ଚାଷୀଙ୍କ ନିକଟରୁ ଧାନ ଆଣି ବାହାରକୁ ଚାଲାଣ ପାଇଁ ଗଛିତ ରଖିଥିଲେ । ହେଲେ ମାଡି ବସିଲା ଯୋଗାଣ ବିଭାଗ। ୮୫ କୁଇଣ୍ଟାଲରୁ ଅଧିକ ଧାନ ଜବତ ହୋଇଛି । ମାଲକାନଗିରି ଜିଲ୍ଲା କାଲିମେଳା ବ୍ଲକ୍ ଏମଭି ୭୯ ଥାନା ଅଞ୍ଚଳରେ ଏମଭି ୭୯ ସଦରରେ ଏମିତି ଘଟଣା ସାମ୍ନାକୁ ଆସିଛି । ବେଆଇନ ଧାନ ଗଛିତ ଥିବା ଖବର ପାଇ ଯୋଗାଣ ଅଧିକାରୀ ଓ ପୁଲିସ ମିଳିତ ଭାବେ ଚଢ଼ାଉ କରିଥିଲେ। ଗୋଦାମରେ ୮୫ କୁଇଣ୍ଟାଲ ଅର୍ଥାତ ୧୬୦ ବସ୍ତାରୁ ଅଧିକ ଧାନ ଗଛିତ ଥିବା ଯୋଗାଣ ବିଭାଗ ଦେଖିବାକୁ ପାଇଥିଲା ।
ଚଢ଼ାଉ ସମୟରେ ଏହି ଧାନ ବିଷୟରେ ନିର୍ମାଣାଧୀନ ଘର ମାଲିକଙ୍କୁ ପଚାରିବାରୁ ତାଙ୍କ ଅବଗତରେ ଏହି ଧାନ ରଖା ଯାଇ ନ ଥିବା କହିଛନ୍ତି। ସୂଚନା ଯୋଗ୍ୟ ଯେ ଏହି ନିର୍ମାଣାଧୀନ ଘର ପରିସରରେ ଯାଞ୍ଚ ପାଇଁ ଯୋଗାଣ ବିଭାଗ ପଶିବା ସମୟରେ ଏମଭି ୭୯ ଅଞ୍ଚଳର ଜଣେ ବ୍ୟବସାୟୀ ଦୀପଙ୍କର ଦେବନାଥ ଏହି ଧାନ ରେଣୁ ବାଲା ମଣ୍ଡଳଙ୍କର ବୋଲି କହିଥିଲେ। ହେଲେ ଉକ୍ତ ନାମଧାରୀ ଚାଷୀଙ୍କର ଧାନ ପୂର୍ବରୁ ଉଠିଥିବା ସହ ଦୀପଙ୍କର କୌଣସି କାଗଜପତ୍ର ଦେଖାଇ ନ ପାରିବାରୁ ଗଚ୍ଛିତ ଧାନବସ୍ତା ଗୁଡ଼ିକୁ ଉଠାଇ ନେଇଥିଲା ବିଭାଗ। ଏହା ସହିତ ଏତେ ପରିମାଣର ଧାନ କେଉଁଠୁ ଆଣିଲେ ଏବଂ କୁଆଡେ ଚାଲାଣ କରାଯିବାର ସମ୍ଭାବନା ଥିଲା ତାହାର ତଦନ୍ତ କରୁଛି ବିଭାଗ।
