ଆଠଗଡ଼: ଆଠଗଡ଼ ଥାନା ଅନ୍ତର୍ଗତ ରାଜନଗର ପଞ୍ଚାୟତର ସଅରସାହିରେ ଜଣେ ବିବାହିତା ମହିଳା ଦୁଷ୍କର୍ମର ଶିକାର ହୋଇଥିବା ଥାନାରେ ଦିଆଯାଇଥିବା ଏତଲାରୁ ଜଣାପଡ଼ିଛି। ଘଟଣାର ବିବରଣୀରୁ ପ୍ରକାଶ ଗତ ମଙ୍ଗଳବାର ରାତିରେ ସଅର ସାହିରେ ନିଜ ଘରେ ଏକୁଟିଆ ଶୋଇଥିବା ବେଳେ ୩୪ ବର୍ଷ ବୟସ୍କ ଜଣେ ମହିଳାଙ୍କୁ ସେହି ଗ୍ରାମର ଅନ୍ୟ ଜଣେ ବିବାହିତ ପ୍ରାୟ ୪୦ ବର୍ଷ ବୟସ୍କ ଲୋକ ବଳପୂର୍ବକ ଦୁଷ୍କର୍ମ କରିଥିବା ପୀଡିତା ମହିଳା ଥାନାରେ ଲିଖିତ ଅଭିଯୋଗ କରିଛନ୍ତି। ସଂପୃକ୍ତ ମହିଳାଙ୍କ ସ୍ୱାମୀ ଭୁବନେଶ୍ୱରରେ କାମ କରୁଥିବା ବେଳେ ସେ ଏକୁଟିଆ ନିଜ ଘରେ ରହିଥିଲେ। ମଙ୍ଗଳବାର ରାତି ପ୍ରାୟ ୧୨ଟା ବେଳେ ଅଭିଯୁକ୍ତ ଯୁବକ ଘର ଭିତରେ ପଶି ଜୋର ଜବରଦସ୍ତ ଏହି ଅଭାବନୀୟ ଘଟଣା ଘଟାଇଥିଲା। ମହିଳାଙ୍କ ଚିତ୍କାର ଶୁଣି ପାଖରେ ରହୁଥିବା ସଂପର୍କୀୟ ଭାଇ ଓ ପଡୋଶୀ ଚାଲି ଆସିବାରୁ ଅଭିଯୁକ୍ତ ଅନ୍ଧାରର ସୁଯୋଗ ନେଇ ସେଠାରୁ ଚମ୍ପଟ ମାରିଥିଲା। ଖବର ପାଇ ପୀଡିତା ମହିଳାଙ୍କ ସ୍ୱାମୀ ଭୁବନେଶ୍ୱରରୁ ଆସିବା ପରେ ବୁଧବାର ରାଜନଗର ସରପଞ୍ଚଙ୍କୁ ଘଟଣା ସଂପର୍କରେ ଜଣାଇଥିଲେ। ତେବେ ଅଭିଯୁକ୍ତ ଗ୍ରାମରୁ ଫେରାର ହୋଇଯାଇଥିବାରୁ ସରପଞ୍ଚ ଘଟଣାର ସମାଧାନ କରିବା ସମ୍ଭବ ହୋଇନଥିଲା। ଫଳରେ ଗୁରୁବାର ସଂପୃକ୍ତ ପୀଡିତା ଆଠଗଡ଼ ଥାନାରେ ଘଟଣା ସଂପର୍କରେ ଲିଖିତ ଅଭିଯୋଗ କରିଥିଲେ। ଏତଲା ପାଇବା ପରେ ପୁଲିସ ସଂପୃକ୍ତ ଅଭିଯୁକ୍ତକୁ ଧରିବାକୁ ଉଦ୍ୟମ କରିଥିଲେ ମଧ୍ୟ ସେ ଫେରାର ଥିବାରୁ ତାକୁ ଗିରଫ କରାଯାଇ ପାରିନାହିଁ। ଆଠଗଡ଼ ଉପଖଣ୍ଡ ପୁଲିସ ଅଧିକାରୀ ରବୀନ୍ଦ୍ର କୁମାର ମଲ୍ଲିକ ଏହି ମାମଲାଟିର ତଦନ୍ତକାରୀ ଅଧିକାରୀ ଭାବେ ଘଟଣାର ତଦନ୍ତ କରୁଛନ୍ତି। ସଂପୃକ୍ତ ମହିଳାଙ୍କର ଡାକ୍ତରୀ ମାଇନା ଓ ଅଭିଯୁକ୍ତକୁ ଗିରଫ କରିବା ପାଇଁ ପଦକ୍ଷେପ ନିଆଯାଉଛି ବୋଲି ଏସଡିପିଓ ଶ୍ରୀ ମଲ୍ଲିକ ପ୍ରକାଶ କରିଛନ୍ତି।
Popular Categories
Previous article
Next article