ସମାଜଲାଇଭ ଡେସ୍କ: ୫୦ କୋଟି ଖର୍ଚ୍ଚ କରି ମୁଖ୍ୟାଳୟ ତିଆରି କଲେ। ହେଲେ ବୈଠକ ଗୃହ ତିଆରି କରିବାକୁ ଭୁଲିଗଲେ। ସରକାରୀ କାର୍ଯ୍ୟାଳୟ ନିର୍ମାଣରେ ଏଭଳି ତ୍ରୁଟି ଏବେ କୌତୁହଳର ବିଷୟ ପାଲଟିଛି। ଘଟଣାଟି ଘଟିଛି ମଧ୍ୟପ୍ରଦେଶର ଭୋପାଳରେ। ଯାହାଫଳରେ ଭୋପାଳ ନଗର ନିଗମର ପ୍ଲାନିଂ ଏବଂ ଇଞ୍ଜିନିୟରିଂ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଭୋପାଳର ତୁଳସୀ ନଗରରେ ପ୍ରାୟ ୫୦ କୋଟି ଟଙ୍କା ବିନିଯୋଗରେ ଭୋପାଳ ନଗର ନିଗମର କୋଠା ତିଆରି ହୋଇଛି। କିନ୍ତୁ ଏହାକୁ ନେଇ ଏବେ ବିବାଦ ସୃଷ୍ଟି ହୋଇଛି। କୋଠାଟି ଦେଖିବାକୁ ଅତି ସୁନ୍ଦର ହୋଇଛି। କିନ୍ତୁ ବୈଠକ ପାଇଁ କୌଣସି ମିଟିଂ ହଲ୍ ନାହିଁ। ମିଟିଂ ହଲରେ ନିଗମର ବୈଠକ ହୋଇଥାଏ, ଯେଉଁଠି ଭୋପାଳ ସହରକୁ ନେଇ ଅନେକ ଯୋଜନା ଏବଂ ପ୍ରସ୍ତାବ ଉପରେ ନିଗମର ମୋହର ଲାଗିଥାଏ।
ବର୍ତ୍ତମାନ ନଗର ନିଗମ ପକ୍ଷରୁ ଭୋପାଳ ଜିଲାପାଳଙ୍କୁ ଚିଠି ଲେଖି କୋଠା ନିକଟରେ ୦.୨୫ ଏକର ଜାଗା ମଗାଯାଇଛି, ଯେଉଁଠି ମିଟିଂ ହଲ୍ ତିଆରି ହେବ। ଏହାକୁ ନେଇ ସ୍ଥାନୀୟ କଂଗ୍ରେସ ନେତା ପ୍ରଶ୍ନ ଉଠାଇଛନ୍ତି। କଂଗ୍ରେସ କାଉନସିଲର ଗୁଡ୍ଡୁ ଚୌହ୍ବାନ କହିଛନ୍ତି, ୫୦ କୋଟି ଟଙ୍କା ଖର୍ଚ୍ଚରେ କୋଠା ତିଆରି ହେଲା। ତେବେ ମିଟିଂ ହଲ୍ କାହିଁକି ତିଆରି ହେଲା ନାହିଁ। ଏବେ ଯେଉଁ ଅତିରିକ୍ତ ଖର୍ଚ୍ଚ ହେବ ତାହା ଜନସାଧାରଣଙ୍କ ଟିକସ ଅର୍ଥରୁ କଟିବ। ଏହି ତ୍ରୁଟି ପାଇଁ ଦାୟୀ କିଏ ବୋଲି ସେ ପ୍ରଶ୍ନ କରିଛନ୍ତି।
