ନୀଳଗିରି: ବାଲେଶ୍ୱର ଜିଲ୍ଲା ଜଳେଶ୍ୱର ଥାନା ସୁଗୋ ନିକଟସ୍ଥ ଧାନସିମୁଳିଆ ଗାଁର ସ୍ୱର୍ଗତଃ ଗୌରାଙ୍ଗ ଚାନ୍ଦଙ୍କ ଦେହାନ୍ତ ପରେ ତାଙ୍କ କନ୍ୟାଝିଅ ଦେବସ୍ମିତା (୨୨) ନିରାଶ୍ରୟ ହୋଇ ପଡ଼ିଛନ୍ତି । ଏନେଇ ବାରିପଦାସ୍ଥିତ ମହିଳା ସୁରକ୍ଷା ମଞ୍ଚର ରାଜ୍ୟ ସଭାପତି ନିରୂପମା ସାହୁ ତାଙ୍କୁ ଆଶ୍ରୟ ଦେବା ସହ ପାଠପଢ଼ା ଦାୟିତ୍ୱ ମଧ୍ୟ ସମ୍ଭାଳିଛନ୍ତି । ସମ୍ପ୍ରତି ଯୁବତୀ ଜଣକ ବାରିପଦାର ଏକ ମହାବିଦ୍ୟାଳୟରେ ଯୁକ୍ତତିନି ପାଠ ପଢ଼ୁଥିବା ଜଣାଯାଇଛି । କିନ୍ତୁ ଗତ ଏପ୍ରିଲ ୧ତାରିଖ ଦିନ ତାଙ୍କ ଜେଜେ ରାମକୃଷ୍ଣ ଚାନ୍ଦ ଘରେ ସାମନ୍ୟ ବଚସା ହୋଇ କୁଆଡ଼େ ଚାଲି ଯାଇଛନ୍ତି ।
ଜେଜେଙ୍କୁ ଝୁରି ଝୁରି ନାତୁଣୀ ଦେବସ୍ମିତା ପୁରୀ, କଲକାତା, ବାଲେଶ୍ୱର, ଭୁବନେଶ୍ୱର ପ୍ରଭୃତି ସ୍ଥାନରେ ଖୋଜି ଖୋଜି ହାଲିଆ ହୋଇ ପଡ଼ିଛନ୍ତି । ପଞ୍ଚଲିଙ୍ଗେଶ୍ୱର ଶୈବପୀଠରେ ଜେଜେ କୁଆଡ଼େ ଫୁଲ ବିକୁଥିବା ସମ୍ପର୍କରେ ଖବରପାଇ ନାତୁଣୀ ଦେବସ୍ମିତା ଏବଂ ଉକ୍ତ ମଞ୍ଚର ସଭାପତି ନିରୂପମା ସାହୁ ଏଠାରେ ପହଞ୍ଚି ଦୋକାନୀ ଓ ଅଞ୍ଚଳବାସୀଙ୍କୁ ଜେଜେ ରାମକୃଷ୍ଣଙ୍କ ଫଟୋ ଦେଖାଇ ସନ୍ଧାନ ନେଉଛନ୍ତି । କିନ୍ତୁ ଏଭଳି ଲୋକଙ୍କୁ ପଞ୍ଚଲିଙ୍ଗେଶ୍ୱରରେ ଦେଖିବାକୁ ପାଇନାହାଁନ୍ତି ବୋଲି ଅଞ୍ଚଳବାସୀଙ୍କଠାରୁ ଶୁଣିବା ପରେ ମନ ଦୁଃଖରେ ଖୋଜୁଛନ୍ତି ନାତୁଣୀ । ପଞ୍ଚଲିଙ୍ଗେଶ୍ୱର ଶୈବପୀଠ, ପାର୍କିଂଷ୍ଟାଣ୍ଡ ତଥା ବିଭିନ୍ନ ସ୍ଥାନରେ ପ୍ରାୟ ଦୀର୍ଘ ୫/୭ଘଣ୍ଟା ଖୋଜିବା ପରେ ନିରାଶ ହୋଇ ନାତୁଣୀ ଫେରି ଯାଇଛନ୍ତି ।
ସୂଚନା ଯେ, ରାମକୃଷ୍ଣ ପେଶାରେ ଜଣେ କଳାକାର । ସେ ବିଭିନ୍ନ ଅଧ୍ୟାତ୍ମିକ କାର୍ଯ୍ୟ ଓ ନୃତ୍ୟଗୀତରେ ରୁଚି ରଖୁଥିବା ଯୋଗୁ ନାତୁଣୀ ଜଣକ ବିଶେଷକରି ତାଙ୍କୁ ଧାର୍ମିକ ପୀଠ ଓ ମଠ ମନ୍ଦିରରେ ଖୋଜୁଥିବା ଜଣାଯାଇଛି ।
Comments are closed.