ନୀଳଗିରି: ମୁଁ ବଞ୍ଚିଛି.. ମତେ ଖାତାରେ ମାରିଦେଲେ । ଖାତାରେ ମାରିବା ପରେ ମୋ ନାଁରେ ଟଙ୍କା ଉଠାଇ ଖାଇଦେଲେ । ଏକଥା ଆମେ କହୁନୁ କହୁଛନ୍ତି ହରିଚନ୍ଦ୍ର ଯୋଜନାରେ ମୃତ ଘୋଷଣା କରାଯାଇଥିବା ବ୍ୟକ୍ତି । ଯାହା ଲୋକଙ୍କୁ ଆଶ୍ଚର୍ଯ୍ୟ କରିଛି ।
ବାଲେଶ୍ୱର ଜିଲା ନୀଳଗିରି ଉପଖଣ୍ଡ ଅଞ୍ଚଳରେ ଦେଖିବାକୁ ମିଳିଛି ଏମିତି ଘଟଣା । ଔପଦା ବ୍ଲକ ଅଧୀନ ଶ୍ୟାମସୁନ୍ଦରପୁର ପଞ୍ଚାୟତର ପୂର୍ବତନ ସରପଞ୍ଚ ତଥା ବର୍ତ୍ତମାନର ଜିଲାପରିଷଦ ସଭ୍ୟା ଉଷାରାଣୀ ରାଉଳ ସରପଞ୍ଚ ଥିବା ସମୟରେ ଏଭଳି ମହାଦୁର୍ନୀତି ହୋଇଥିବା ନଜିର ଆସିଛି । ସେହି ଗାଁର ଅକ୍ଷୟ ମହାଳିକଙ୍କ ପୁଅ ଅଭିମନ୍ୟୁ ସମ୍ପ୍ରତି ରାଜମିସ୍ତ୍ରୀ ଭାବେ କାମକରନ୍ତି । ଆଉ ସେହି ରୋଜଗାର ଟଙ୍କାରେ ନିଜର ତେଲ ଲୁଣ ସଂସାର ଚଳାନ୍ତି । ୨୦୨୦ ଏପ୍ରିଲ ୨୭ତାରିଖରେ ତାଙ୍କ ନାମରେ ହରିଶ୍ଚନ୍ଦ୍ର ଯୋଜନାରେ ଟଙ୍କା ଉଠାଯାଇ ଚଳୁ କରାଯାଇଛି ।
ସବୁଠାରୁ ଆଶ୍ଚର୍ଯ୍ୟକର କଥା ଶ୍ୟାମସୁନ୍ଦରପୁର ପଞ୍ଚାୟତର ଶ୍ରୀଦେଇପୁର ଗାଁର ବାବାଜି ପାତ୍ରଙ୍କ ସ୍ତ୍ରୀ ସାବିତ୍ରୀଙ୍କ ଦେହାନ୍ତ ହୋଇଥିଲା । କିନ୍ତୁ ସମ୍ପୃକ୍ତା ମହିଳାଙ୍କ ଦେହାନ୍ତ ପରେ ସେ ନିଜେ ଦସ୍ତଖତ କରି ଟଙ୍କା ଉଠାଇଥିବା ମଧ୍ୟ ଦେଖିବାକୁ ମିଳିଛି । ଯାହା ସ୍ଥାନୀୟ ଲୋକଙ୍କୁ ତାଜୁବ କରିଛି । କେବଳ ଏତିକି ନୁହେଁ, ଏକାଧିକ ଲୋକଙ୍କ ନାମରେ ହରିଶ୍ଚନ୍ଦ୍ର ଯୋଜାନାରେ ଟଙ୍କା ଉଠାଣ କରାଯାଇଥିବା ଅଭିଯୋଗ ହୋଇଛି । ଘଟଣା ସମ୍ପର୍କରେ ନୀଳଗିରି ଉପଜିଲାପାଳ ଦୀପ୍ତିରଞ୍ଜନ ସେଠୀ ଜାଣିବା ପରେ ଔପଦା ବିଡିଓଙ୍କୁ ତଦନ୍ତ ନିର୍ଦେଶ ଦେଇଛନ୍ତି ।
Comments are closed.