ନୀଳଗିରି: ବାଲେଶ୍ୱର ଜିଲା ନୀଳଗିରି ଥାନା ଅଞ୍ଚଳରେ ଚାଲିଥିଲା ସେକ୍ସ ର୍ୟାକେଟ । ଏହି କାରବାରକୁ ନିଜ ଘରେ ଚଳାଇ ଆସୁଥିଲେ ଦମ୍ପତି । ଗାଁଲୋକଙ୍କ ସନ୍ଦେହ ହେବାରୁ ଚଢ଼ାଉ କରାଯିବା ପରେ ସବୁ ଘଟଣା ସାମ୍ନାକୁ ଆସିଛି । ସ୍ଥାନୀୟ ପୁଲିସ ଏହି ର୍ୟାକେଟର ରାଣୀ ମହୁମାଛି ସମେତ ୨ଜଣ ଗରାଖକୁ ଅଟକ ରଖିଥିବା ବେଳେ ୨ଜଣ ଯୁବତୀଙ୍କୁ ଉଦ୍ଧାର କରିଛି ।
ମିତ୍ରପୁର କେପିମାହାଲ ବାଦାମବାଡ଼ିରେ ପ୍ରତିଦିନ ଅଜଣା ଯୁବକ ଯୁବତୀଙ୍କ ଯାତାୟାତ କରିବା ନେଇ ଗ୍ରାମବାସୀଙ୍କ ସନ୍ଦେହ ହୋଇଥିଲା । ଏନେଇ ଆଜି ରାତିରେ ଗ୍ରାମବାସୀ ସେହି ସ୍ଥାନରେ ହୋହଲ୍ଲା କରିବା ପରେ ସେକ୍ସ ର୍ୟାକେଟ ଚାଲିଥିବା ନେଇ ସ୍ପଷ୍ଟ ହୋଇ ଯାଇଥିଲେ । ବାଲେଶ୍ୱର ଓ ମୟୂରଭଞ୍ଜ ଜିଲା ଉଦଳା ଅଞ୍ଚଳର ୨ଜଣ ଗରାଖକୁ ଗ୍ରାମବାସୀ କାବୁ କରିବା ପରେ ଉତ୍ତମ ମଧ୍ୟମ ଦେଇ ଏକ ଗଛରେ ବାନ୍ଧି ଦେଇଥିଲେ ।
ଗୃହମାଲିକ ଜଣକ ମାଡ଼ ଖାଇ ଘଟଣା ସ୍ଥଳରକୁ କୌଶଳ କରି ଚମ୍ପଟ ମାରିଥିବା ବେଳେ ତାଙ୍କ ପତ୍ନୀ ତଥା ରାଣୀ ମହୁମାଛି ଧରା ପଡ଼ି ଯାଇଛି । ଏହି ଦେହ ବ୍ୟବସାୟରେ ଲିପ୍ତ ରହିଥିବା ଭୁବନେଶ୍ୱର ଓ ବାରିପଦା ଅଞ୍ଚଳର ୨ଜଣ ଯୁବତୀଙ୍କୁ ପୁଲିସ ଉଦ୍ଧାର କରିଛି । ରାତି ୧୦ଟାରେ ନୀଳଗିରି ପୁଲିସ ଘଟଣାସ୍ଥଳରେ ପହଞ୍ଚି ୨ଯୁବତୀଙ୍କୁ ଉଦ୍ଧାର କରି ଥାନାକୁ ଆଣିଥିବା ବେଳେ ରାଣୀ ମହୁମାଛି ଓ ୨ଗରାଖକୁ ଅଟକ ରଖି ପଚରା ଉଚରା ଚଳାଇଛି । ସେହିପରି ଏହି ଘଟଣାରେ ପୁଲିସ ୩ଟି ବାଇକ ଓ ଗୋଟିଏ କାରକୁ ମଧ୍ୟ ଜବତ କରିଥିବା ସୂଚନା ମିଳିଛି ।
