କଲକାତା: ଭାରତୀୟ ସେନାରେ ନିଯୁକ୍ତି ପାଇଛନ୍ତି ଦୁଇ ଛଦ୍ମବେଶୀ ପାକିସ୍ତାନ ନାଗରିକ। ଜୟକାନ୍ତ କୁମାର ଓ ପ୍ରଦ୍ୟୁମ୍ନ କୁମାର ନାମକ ଏହି ଦୁଇ ଜଣ ସମ୍ପ୍ରତି ୨୪ପ୍ରଗଣା ଜିଲା ଅନ୍ତର୍ଗତ ବରାକପୁରସ୍ଥିତ କ୍ୟାଣ୍ଟନମେଣ୍ଟରେ କାର୍ଯ୍ୟରତ ଅଛନ୍ତି। ସେନାରେ ନିଯୁକ୍ତି ପାଇଁ ସେମାନେ କିଛି ରାଜନେତା, ସରକାରୀ ବାବୁ ଓ ପୁଲିସ କର୍ମଚାରୀଙ୍କ ସହାୟତାରେ ନିଜ ପରିଚୟ ଓ ଏ ସଂକ୍ରାନ୍ତ କାଗଜପତ୍ର ନକଲ କରିଛନ୍ତି। ଏହି ଦୁଇ ଜଣ ଷ୍ଟାଫ୍ ସିଲେକ୍ସନ୍ କମିସନ ପରୀକ୍ଷାରେ ଉତ୍ତୀର୍ଣ୍ଣ ହୋଇ ନିଯୁକ୍ତି ପାଇଛନ୍ତି। ଏଭଳି ନିଯୁକ୍ତି କ୍ଷେତ୍ରରେ ଏକ ରାକେଟ୍ ଚାଲିଛି। ଦେଶର ସୁରକ୍ଷା ପ୍ରତି ଏହା ଅତ୍ୟନ୍ତ ବିପଜ୍ଜନକ ବୋଲି ଦର୍ଶାଇଛନ୍ତି ବିଷ୍ଣୁ ଚୌଧୁରୀ ନାମକ ଜଣେ ସ୍ଥାନୀୟ ବ୍ୟକ୍ତି।
ଏହାର ତଦନ୍ତ ଦାବି କରି ସେ ଜୁନ୍ ୧୩ରେ କଲକାତା ଉଚ୍ଚନ୍ୟାୟାଳୟଙ୍କ ଦ୍ବାରସ୍ଥ ହୋଇଥିଲେ। ବିଚାରପତି ରାଜଶେଖର ମନ୍ତଙ୍କ ଇଜଲାସ୍ରେ ଏହା ବିଚାର ପାଇଁ ଗୃହୀତ ହୋଇଥିଲା। ମଙ୍ଗଳବାର ବିଚାରପତି ରାଜଶେଖର ଏହି ଅଭିଯୋଗ ଉପରେ ତଦନ୍ତ ପାଇଁ ସିବିଆଇକୁ ନିର୍ଦେଶ ଦେଇଛନ୍ତି। କେବଳ ସେତିକି ନୁହେଁ, ପଶ୍ଚିମବଙ୍ଗ ପୁଲିସର ସିଆଇଡି ମଧ୍ୟ ସମାନ୍ତରାଳ ଭାବେ ଏହି ଘଟଣାର ତଦନ୍ତ କରିପାରିବ ବୋଲି ବିଚାରପତି କହିବା ସହ ସିଆଇଡିକୁ ତଦନ୍ତ ନିର୍ଦେଶ ଦେଇଛନ୍ତି। ଦେଶର ସୁରକ୍ଷା ଦୃଷ୍ଟିରୁ ଏହା ଅତ୍ୟନ୍ତ ଗର୍ହିତ ପ୍ରସଙ୍ଗ ହୋଇଥିବାରୁ ଉଭୟ ସଂସ୍ଥା ଅଭିଯୋଗର ତଦନ୍ତ କରିବାରେ କୌଣସି ଅସୁବିଧା ନାହିଁ ବୋଲି ବିଚାରପତି ରାଜଶେଖର ମତ ଦେଇଛନ୍ତି। ଏହି ମାମଲାରେ ବିଚାରପତି କେନ୍ଦ୍ର ସରକାର, ଭାରତୀୟ ସେନାର ଇଷ୍ଟର୍ଣ୍ଣ କମାଣ୍ଡ ଓ ସିବିଆଇକୁ ପକ୍ଷ କରିଛନ୍ତି। କଥିତ ରାକେଟ୍ର ଚେର ଉତ୍ତର ପ୍ରଦେଶ, ଆସାମ ଓ ବିହାରକୁ ଲମ୍ବିଥିବା ସୂଚନା ମିଳୁଥିବାରୁ ଏହାକୁ ଠାବ କରିବା ଅତ୍ୟନ୍ତ ଜରୁରୀ ବୋଲି ବିଚାରପତି କହିଛନ୍ତି। ସେଥିପାଇଁ ସିଆଇଡି ଓ ସିବିଆଇ ମିଳିତ ଭାବେ ଅଭିଯୋଗ ଉପରେ ଗୁରୁତ୍ବର ସହ ତଦନ୍ତ କରିବାକୁ ବିଚାରପତି ନିର୍ଦେଶ ଦେଇଛନ୍ତି। ଜୁଲାଇ ୨୬ ସୁଦ୍ଧା ତଦନ୍ତର ଅଗ୍ରଗତି ସମ୍ପର୍କେର ରିପୋର୍ଟ ଦାଖଲ ପାଇଁ ମଧ୍ୟ ସେ ଉଭୟ ସଂସ୍ଥାକୁ ନିର୍ଦେଶ ଦେଇଛନ୍ତି।
