ନୂଆଦିଲ୍ଲୀ : କ୍ରମାଗତ ଭାବେ ଷଷ୍ଠ ତ୍ରୈମାସ ପାଇଁ ନିମ୍ନଗାମୀ ହୋଇଛି ଅଭିବୃଦ୍ଧି ଦେଶର ଆର୍ଥିକ ଅଭିବୃଦ୍ଧିରେ ଏଭଳି ହ୍ରାସ ମାନ୍ଦାବସ୍ଥା ପ୍ରଭାବକୁ ସୂଚାଉଛି। ଚଳିତ ଆର୍ଥିକବର୍ଷର ଜୁଲାଇ-ସେପ୍ଟେମ୍ବରରେ ତ୍ରୈମାସରେ ମୋଟ ଘରୋଇ ଉତ୍ପାଦ (ଜିଡିପି) ଅଭିବୃଦ୍ଧି ୪.୭% ରହିବ। ଚଳିତବର୍ଷର ଏପ୍ରିଲ-ଜୁନ୍ ପରେ ଅଭିବୃଦ୍ଧିରେ ଏହା ହେଉଛି ସବୁଠାରୁ ନିମ୍ନତମ ବୋଲି ଫିଚ୍ ଗ୍ରୁପର ଇଣ୍ଡିଆ ରେଟିଂସ ଆଣ୍ଡ୍ ରିସର୍ଚ୍ଚ ପକ୍ଷରୁ ଏକ ରିପୋର୍ଟରେ ଆକଳନ କରାଯାଇଛି।
ଚଳିତବର୍ଷର ଏପ୍ରିଲ-ଜୁନ୍ ତ୍ରୈମାସରେ ଜିଡିପି ଅଭିବୃଦ୍ଧି ୫% ରହିଥିଲା, ଯାହାକି ୨୦୧୩ ପରେ ସବୁଠାରୁ କମ୍ ରହିଥିଲା ା ଏଭଳି ସ୍ଥଳେ ଜୁଲାଇ-ସେପ୍ଟେମ୍ବର ତ୍ରୈମାସରେ ଅଭିବୃଦ୍ଧି ୫% ତଳକୁ ଖସିବା ସମ୍ପର୍କିତ ଏହି ରିପୋର୍ଟ ସରକାରଙ୍କ ପାଇଁ ନିଶ୍ଚିତ ଭାବେ ଏକ ସତର୍କବାଣୀ। ୨୦୧୯-୨୦ ଆର୍ଥିକବର୍ଷରେ ଅଭିବୃଦ୍ଧି ୫.୬% ରହିବ ବୋଲି ଆକଳନ କରାଯାଇଛି। ଏହାକୁ ମିଶାଇ ଚତୁର୍ଥ ଥର ପାଇଁ ଏଜେନ୍ସି ଜିଡିପିରେ ଏଭଳି ସଂଶୋଧନ କରିଛି। ମାତ୍ର ମାସକ ତଳେ ୨୦୧୯-୨୦ରେ ଦେଶର ଜିଡିପି ଅଭିବୃଦ୍ଧି ୬.୧% ରହିବ ବୋଲି ଫିଚ୍ କହିଥିଲା। ଏହି ସମୟରେ ଅଭିବୃଦ୍ଧି ୫.୮% ରହିବା ନେଇ ପୂର୍ବରୁ ରେଟିଂ ଏଜେନ୍ସି ମୁଡିସ୍ ଆକଳନ କରିଥିଲା, କିନ୍ତୁ ଫିଚ୍ର ଉପରୋକ୍ତ ଆକଳନ ଏହାଠାରୁ ଢେର କମ୍ ଥିବା ଜଣାଯାଇଛି। ଦେଶର ଜିଡିପି ଅଭିବୃଦ୍ଧି କ୍ଷେତ୍ରରେ ଦେଖାଦେଇଥିବା ଏଭଳି ମନ୍ଥରତାକୁ ପ୍ରତିହତ କରିବା ପାଇଁ ମୋଦି ସରକାରଙ୍କ ପକ୍ଷରୁ ବହୁବିଧ ପଦକ୍ଷେପ ଗ୍ରହଣ ସତ୍ତ୍ବେ ଜିଡିପି ସମ୍ପର୍କିତ ଏଭଳି ତଥ୍ୟ କେନ୍ଦ୍ର ଏବେ ମୁଣ୍ଡବିନ୍ଧାର କାରଣ ହୋଇଛି। କେନ୍ଦ୍ର ସରକାର ଚଳିତବର୍ଷ ସେପ୍ଟେମ୍ବରରେ କମ୍ପାନୀ ଟିକସ ହାର ୩୦%ରୁ ୨୨%କୁ ହ୍ରାସ ଘଟାଇଥିଲେ। ନୂଆ ବିଦେଶୀ ପୁଞ୍ଜି ନିବେଶ ଆକୃଷ୍ଟି କରିବା ପାଇଁ ନୂଆ ବିନିର୍ମାଣ କମ୍ପାନୀଙ୍କ ପାଇଁ ଟିକସ ହାର ୧୫%କୁ ହ୍ରାସ କରିଥିଲେ। କେନ୍ଦ୍ର ସରକାର ବ୍ୟାଙ୍କ ମିଶ୍ରଣ, ଅଟୋ କ୍ଷେତ୍ରକୁ ସହାୟତା, ଭିତ୍ତିଭୂମି କ୍ଷେତ୍ରରେ ବ୍ୟୟ ଯୋଜନା ସହ ଷ୍ଟାର୍ଟ ଅପ୍ଙ୍କୁ ଟିକସ ରିଆତି ଭଳି ପଦକ୍ଷେପ ଗ୍ରହଣ କରିଥିଲେ। ତେବେ ଭାରତ ପାଇଁ ୫.୬% ଜିଡିପି ଅଭିବୃଦ୍ଧି ନିହାତି ଜରୁରୀ ଥିବା ଫିଚ୍ କହିଛି।
