ନୂଆଦିଲ୍ଲୀ: କେନ୍ଦ୍ର ସରକାର ଚଳିତ ମାସ ୧୮ରୁ ୨୨ ପର୍ଯ୍ୟନ୍ତ ସଂସଦର ସ୍ବତନ୍ତ୍ର ଅଧିବେଶନ ଆହ୍ବାନ କରିଛନ୍ତି। ଗଣେଶ ପୂଜା, ୧୯ତାରିଖରୁ ନୂତନ ସଂସଦ ଭବନରେ ଏହି ଅଧିବେଶନ ବସିବ; ତେବେ ଏହାର ତାତ୍ପର୍ଯ୍ୟ ଓ କାର୍ଯ୍ୟସୂଚୀ ଅଦ୍ୟାବଧି ସ୍ପଷ୍ଟ କରାଯାଇନଥିବାରୁ ବିଭିନ୍ନ ମହଲରୁ ପ୍ରତିକ୍ରିୟା ପ୍ରକାଶ ପାଉଛି। ଏପରିସ୍ଥଳେ ସରକାର ମଙ୍ଗଳବାର ଅଧିବେଶନକୁ ନେଇ ନୂଆ ବିବାଦର ସୂତ୍ରପାତ କରାଇଛନ୍ତି। ଅଧିବେଶନ ପାଇଁ ସଂସଦର ବିଭିନ୍ନ ବର୍ଗର କର୍ମଚାରୀଙ୍କ ପାଇଁ ନୂଆ ୟୁନିଫର୍ମ (ପୋଷାକ) ଉନ୍ମୋଚନ କରିଛନ୍ତି। ନ୍ୟାସନାଲ ଇନ୍ଷ୍ଟିଚ୍ୟୁଟ୍ ଅଫ ଫେସନ୍ ଟେକ୍ନୋଲଜି (ଏନ୍ଆଇଏଫ୍ଟି) ଦ୍ବାରା ଡିଜାଇନ୍ କରାଯାଇଥିବା ଏହି ୟୁନିପର୍ମ ସମ୍ପୂର୍ଣ୍ଣ ଭାରତୀୟ ଶୈଳୀରେ ପ୍ରସ୍ତୁତ। ଏଥିରେ ନେହେରୁ ଜ୍ୟାକେଟ ଓ ଖାକି ପ୍ୟାଣ୍ଟ ଭଳି ଅନେକ ନୂତନତ୍ବ ରହିଛି। ପୂର୍ବରୁ ପ୍ରଚଳିତ ସଫାରୀ ସୁଟ୍ ଓ ବନ୍ଧଗଳା ସୁଟ୍କୁ ପରିବର୍ତ୍ତନ କରାଯାଇଛି।
http://ଭାରତକୁ ଖଲିସ୍ତାନୀଙ୍କ ଧମକ
ଅଧିକାରୀମାନେ ବନ୍ଧଗଳା ସୁଟ୍ ପରିବର୍ତ୍ତେ ସ୍ବତନ୍ତ୍ର ରଙ୍ଗର ସାର୍ଟ ଓ ଖାକି ପ୍ୟାଣ୍ଟ ସହ ନେହେରୁ ଜ୍ୟାକେଟ ପିନ୍ଧିବେ। ସାର୍ଟରେ ପଦ୍ମ ଫୁଲ ଚିତ୍ର ହୋଇଛି। ମାର୍ଶାଲମାନେ ମଣିପୁରୀ ପଗଡ଼ି ସହ ସ୍ବତନ୍ତ୍ର ପୋଷାକ ପିନ୍ଧିବେ। ପୁରୁଷ ଓ ମହିଳା କର୍ମଚାରୀଙ୍କ ପାଇଁ ଭିନ୍ନ ଭିନ୍ନ ପୋଷାକ ଡିଜାଇନ୍ କରାଯାଇଛି। ମହିଳାଙ୍କ ଶାଢ଼ିରେ ମଧ୍ୟ ପଦ୍ମ ଫୁଲ ଚିତ୍ର ହୋଇଛି। ନବନିର୍ମିତ ସଂସଦ ଭବନରେ ବିଜେପିର ପ୍ରତୀକ ପଦ୍ମଫୁଲକୁ ପ୍ରତିଫଳିତ କରାଯାଇଥିବାବେଳେ କର୍ମଚାରୀଙ୍କ ପୋଷାକରେ ଦଳୀୟ ଚିହ୍ନ ରଖାଯିବା ନେଇ ବିରୋଧୀ ଦଳ ନେତାମାନେ ପ୍ରତିବାଦ କରିଛନ୍ତି। କଂଗ୍ରେସ ବିଶେଷ ଭାବେ ଏହାର ସମାଲୋଚନା କରିଛି।
