ନୂଆଦିଲ୍ଲୀ: ନ୍ୟାସନାଲ ହେରାଲ୍ଡ ମାମଲାରେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଜେରା କରିଛି ପ୍ରବର୍ତ୍ତନ ନିର୍ଦେଶାଳୟ । ଲଗାତର ୩ଘଣ୍ଟା ଜେରା କରିବା ପରେ ପ୍ରବର୍ତ୍ତନ ନିର୍ଦେଶାଳୟ କାର୍ଯ୍ୟାଳୟ ବାହାରକୁ ରାହୁଲ ଗାନ୍ଧୀ ଆସିଥିବା ଦେଖିବାକୁ ମିଳିଛନ୍ତି । ମିଳିଥିବା ସୂଚନା ଅନୁସାରେ ରାହୁଲ ମଧ୍ୟାହ୍ନ ଭୋଜନ କରିସାରିବା ପରେ ପୁଣି ତାଙ୍କୁ ଜେରା କରାଯିବ ।
ନ୍ୟାସନାଲ ହେରାଲ୍ଡ ମାମଲାକୁ ନେଇ ରାହୁଲଙ୍କୁ ଆହୁରି ଅନେକ ପ୍ରଶ୍ନ କରିବ ଇଡି । ତେବେ ଇଡି ବର୍ତ୍ତମାନ କେଉଁ କେଉଁ ପ୍ରଶ୍ନ ରାହୁଲଙ୍କୁ ପଚାରିଛି ତାହା ସୂଚନା ଦିଆଯାଇନାହିଁ । ଏନେଇ ରାହୁଲ ମଧ୍ୟ କିଛି ପ୍ରତିକ୍ରିୟା ରଖିନାହାନ୍ତି । ସେପଟେ ରାହୁଲଙ୍କୁ ଜେରା କରାଯିବାନେଇ ଦିଲ୍ଲୀରେ କଂଗ୍ରେସର ଶତାଧିକ କର୍ମୀ ଓ ନେତା ବିକ୍ଷୋଭ ପ୍ରଦର୍ଶନ କରିଥିଲେ । ଏଆଇସିସି ମୁଖ୍ୟାଳୟ ଆଗରେ ରାହୁଲଙ୍କ ସମର୍ଥନ ମାନେ ନାରାବାଜି ଦେବା ସହ ବିକ୍ଷୋଭ କରିଥିଲେ ।
ଘଟଣାକୁ ଆୟତ୍ତ କରିବାକୁ ପୁଲିସ ୨୫୦ରୁ ଅଧିକ କଂଗ୍ରେସ କର୍ମୀଙ୍କୁ ଅଟକ ରଖିଛି । ଖାଲି ସେତିକି ନୁହେଁ ଦିଲ୍ଲୀ ସମତେ ବିଭିନ୍ନ ରାଜ୍ୟରେ କଂଗ୍ରେସ କର୍ମୀ ମାନେ ଘଟଣାକୁ ତୀବ୍ର ବିରୋଧ କରିବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି । ଗୁଜରାଟର ଅହମ୍ମଦାବାଦରେ ଏହି ଘଟରାକୁ ବିରୋଧ କରାଯାଉଥିବା ବେଳେ ଓଡ଼ିଶାର ଭୁବନେଶ୍ୱରରେ ମଧ୍ୟ ଦଳ ପକ୍ଷରୁ ବଡ଼ ଧରଣର ବିକ୍ଷୋଭ କରାଯାଇଛି । ଲଖନଉରେ ମଧ୍ୟ କଂଗ୍ରେସ ଏହାକୁ ଘୋର ବିରୋଧ କରିଛି ।
ସୂଚନା ଥାଉକି, ଗତ ୩ ତାରିଖରେ ନେସନାଲ ହେରାଲ୍ଡ ମାମଲାରେ ପ୍ରବର୍ତ୍ତନ ନିର୍ଦେଶାଳୟ ବା (ଇଡି) ରାହୁଲଙ୍କୁ ସମନ କରିଥିଲା । ପୂର୍ବରୁ ମଧ୍ୟ ଏହି ମାମଲାରେ ଇଡି ଗୋଟିଏ ଥର ସମନ କରିସାରିଥିବା ବେଳେ ଏହା ଥିଲା ଇଡିର ଦ୍ବିତୀୟ ଥର ପାଇଁ ସମନ । ସମନ ଅନୁଯାୟୀ ଜୁନ୍ ୧୩ ତାରିଖ ଅର୍ଥାତ୍ ଆଜି ପ୍ରବର୍ତ୍ତନ ନିର୍ଦେଶାଳୟ କାର୍ଯ୍ୟାଳୟରେ ହାଜର ହେବା ପାଇଁ ତାଙ୍କୁ କୁହାଯାଇଥିଲା ।
ଏହା ପୂର୍ବରୁ ଜୁନ୍ ୨ ତାରିଖରେ ଇଡି ରାହୁଲଙ୍କୁ ଡକାଇଥିଲା । ହେଲେ ରାହୁଲ ବିଦେଶରେ ଥିବା ଦର୍ଶାଇ ହାଜର ହୋଇନଥିଲେ । ଏହି ମାମଲାରେ ସୋନିଆଙ୍କୁ ମଧ୍ୟ ସମନ ହୋଇଛି । ହେଲେ ତାଙ୍କର ସ୍ୱାସ୍ଥାବସ୍ଥା ଖରାପ ଥିବାରୁ ସେ ୩ ସପ୍ତାହ ଇଡିକୁ ସମୟ ମାଗିଛନ୍ତି । ଆଜି ରାହୁଲ ପ୍ରବର୍ତ୍ତନ ନିର୍ଦେଶାଳୟ କାର୍ଯ୍ୟାଳୟରେ ହାଜର ହୋଇଥିବା ବେଳେ ତାଙ୍କୁ ୩ ଘଣ୍ଟା ଧରି ଜେରା କରିଛି ଇଡି ।
