ମୁଖୀଗୁଡା: ସରକାରଙ୍କ ତରଫରୁ ବିଭିନ୍ନ ଜନହିତକର ଯୋଜନା ପ୍ରସ୍ତୁତ ହେଉଛି। ହେଲେ ରାଜନୈତିକ ଇଛାଶକ୍ତିର ଅଭାବ ଏବଂ ସରକାରୀ ବାବୁଙ୍କ ଦାୟିତ୍ୱହୀନତା ଯୋଗୁଁ ଆଜି ବି ଜଣେ ଅସହାୟ ବୃଦ୍ଧା ପଲିଥିନ ତଳେ ଜୀବନ ବିତାଇବାକୁ ବାଧ୍ୟ ହେଉଛନ୍ତି। ଘରଟିଏ ପାଇଁ ସରପଞ୍ଚଙ୍କଠାରୁ ବିଡିଓ ଯାଏଁ ସମସ୍ତଙ୍କୁ ଗୁହାରି କଲେ, ହେଲେ କେବଳ ଆଶ୍ୱାସନା ବ୍ୟତୀତ କିଛି ମିଳିଲା ନାହିଁ ସରୋଜିନୀଙ୍କୁ।
କଳାହାଣ୍ଡି ଜିଲ୍ଲା ଜୟପାଟଣା ପଞ୍ଚାୟତ ୬ନମ୍ବର ୱାର୍ଡ ଡାକ୍ତରଖାନା ପଛପଟେ କେନାଲ ହୁଡାରେ ସରୋଜିନୀ ବାଗ(୭୫) ଗତ ପ୍ରାୟ ୨୦ବର୍ଷ ତଳେ କୁଡ଼ିଆ କରି ରହିବା ଆରମ୍ଭ କରିଥିଲେ। ଭବାନୀପାଟଣାରେ ସ୍ୱାମୀଙ୍କ ମୃତ୍ୟୁ ପରେ ସେ ଜୟପାଟଣାକୁ ଆସିଥିଲେ। ସ୍ଥାନୀୟ ଏକ ହୋଟେଲରେ କାମ କରି ପେଟ ପୋଷୁଥିଲେ। ଇତି ମଧ୍ୟରେ ସରୋଜିନୀଙ୍କର ଗୋଡ଼ ଭାଙ୍ଗିବା ପରେ ସରକାରଙ୍କ ତରଫରୁ ଅଗ୍ରାଧିକାର ପରିବାର ରେସନ କାର୍ଡ ଚାଉଳ ଏବଂ ଭତ୍ତା ଟଙ୍କାରେ ପେଟକୁ ଦିମୁଠା ଖାଇବାକୁ ହୋଇ ଯାଉଥିବା ବେଳେ ନା ନିଜ କୁଡ଼ିଆ ମରାମତି କରିପାରିଲେ ନା ସରକାରଙ୍କ ତରଫରୁ ଆବାସ ଯୋଜନାରେ ଘର ଖଣ୍ଡେ ମିଳିପାରିଲା। ଗତ ବର୍ଷ ବର୍ଷାରେ ତାଙ୍କ ଘର ଭାଙ୍ଗି ଯାଇଥିଲା। ତହସିଲ କାର୍ଯ୍ୟାଳୟରୁ କେବଳ ପଲିଥିନ ମିଳିଲା, ଯାହାକୁ ଭଙ୍ଗା କୁଡ଼ିଆରେ ଢାଙ୍କି ରହୁଛନ୍ତି। ଏବେ ପବନ ହେଲେ କିମ୍ବା ବର୍ଷା ହେଲେ ପଡୋଶୀ ଘରକୁ ଲୁଚିବାକୁ ଚାଲି ଯାଆନ୍ତି ସରୋଜିନୀ। ଘରଟିଏ ପାଇଁ ସେ ଗୁହାରି କରିଛନ୍ତି ସରପଞ୍ଚଙ୍କଠାରୁ ବିଡିଓ ଯାଏଁ, ହେଲେ କେହି ତାଙ୍କ ଗୁହାରି ଶୁଣିଲେନି। ତଥାପି ବୟସର ଅପରାହ୍ନରେ ଆଶା ରଖିଛନ୍ତି ସରୋଜିନୀ ତାଙ୍କ ଦୁଃଖ ଶୁଣିବେ ସରକାର, ତାଙ୍କୁ ଘରଟିଏ ମିଳିବ ବୋଲି। ହେଲେ ଏଠାରେ ପ୍ରଶ୍ନ ଉଠୁଛି ଆବାସ ଯୋଜନାରେ ସାମିଲ ହେଉଛନ୍ତି କେଉଁମାନେ ? ସରୋଜିନୀଙ୍କ ପରି ଅସହାୟ ଗରିବ ମହିଳା ଯାହାର କେହି ନାହିଁ, ସେ କ’ଣ ଏକ ଘର ପାଇବା ପାଇଁ ଯୋଗ୍ୟ ନୁହନ୍ତି କି? ଏନେଇ ଜୟପାଟଣା ବିଡିଓଙ୍କ ମତାମତ ମିଳିନାହିଁ। ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଦାବି ହେଉଛି।
Comments are closed.