ବାସୁଦେବପୁର: ଦୋକାନ ବନ୍ଦକରି ଘରକୁ ଫେରୁଥିବା ସୁନା ଦେକାନୀଙ୍କଠାରୁ ଅଳଙ୍କାର ବ୍ୟାଗ ଲୁଟିନେଲେ ଲୁଟେରା। କିଆପଡା ବ୍ରାହ୍ମଣୀଗାଁ ରାସ୍ତାର ବଜାର ନିକଟରେ ଘଟିଛି ଏଭଳି ଘଟଣା। ଲୁଟର ଶିକାର ହୋଇଛନ୍ତି ସିମୁଳିଆ ଥାନା ବେଗୁନିଆ ଗାଁର ପ୍ରହଲ୍ଲାଦ ସାହୁ। ନଗଦ ୩୦ ହଜାର ଟଙ୍କା ସହ ଅଳଙ୍କାର ବ୍ୟାଗ ଲୁଟି ନେଇଛନ୍ତି ଲୁଟେରା। ଲୁଟ୍ ହୋଇଥିବା ଅଳଙ୍କାର ମୂଲ୍ୟ ୮ ଲକ୍ଷରୁ ଅଧିକ ହେବ। ଘଟଣାକୁ ନେଇ ସାହୁ ବାସୁଦେବପୁର ଥାନାରେ ଅଭିଯୋଗ କରିଛନ୍ତି।
ବ୍ୟବସାୟୀ ସାହୁଙ୍କର ବାସୁଦେବପୁର ଥାନା କମାରଗାଁ ବଜାରରେ ଅହଲ୍ୟା ଜୁଏଲାରୀ ନାମରେ ମରାମତି ଦୋକାନ ରହିଛି। ସବୁଦିନ ପରି ପ୍ରହଲ୍ଲାଦ ଦୋକାନ ବନ୍ଦକରି ସମସ୍ତ ଅଳଙ୍କାରକୁ ବ୍ୟାଗରେ ପୁରାଇ ଲୁନାଗାଡ଼ିରେ ଘରକୁ ଫେରୁଥିଲେ। କିଆପଡା ବ୍ରାହ୍ମଣୀଗାଁ ରାସ୍ତାର ବଜାର ନିକଟରେ ୩ ଜଣ ଯୁବକ ବାଇକରେ ଆସି ପ୍ରହଲ୍ଲାଦଙ୍କୁ ଗୋଇଠା ମାରି ବ୍ୟାଗ ଛଡ଼ାଇନେଇ ଫେରାର ହୋଇଯାଇଥିଲେ। କେତେକ ଯୁବକ ଲୁଟେରାଙ୍କ ପିଛା କରିଥିଲେ ବି ଧରିବାରେ ସକ୍ଷମ ହୋଇ ନ ଥିଲେ। ପୁଲିସ ଅଭିଯୋଗ ପାଇ ତଦନ୍ତ ଆରମ୍ଭ କରିଛି।
