ଭୁବନେଶ୍ୱର : ଓଡ଼ିଶାରେ ଖଣି କାରବାରରେ ସନ୍ତୋଷ ପ୍ରକାଶ କରିଛନ୍ତି କେନ୍ଦ୍ର ଖଣି ସଚିବ ଅନିଲ ଗୋପୀଶଙ୍କର ମୁକିମ। ଓଡ଼ିଶା ହେଉଛି ଦେଶର ଖଣି ରାଜଧାନୀ। ରାଜ୍ୟରେ ଖଣି କାରବାର ଅତ୍ୟନ୍ତ ସନ୍ତୋଷଜନକ ଥିବା ପ୍ରକାଶ କରି ରାଜ୍ୟ ସରକାରଙ୍କୁ ସେ ପ୍ରଶଂସା କରିଛନ୍ତି।
ଶୁକ୍ରବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସୌଜନ୍ୟମୂଳକ ସାକ୍ଷାତ କରିବା ପରେ ଗଣମାଧ୍ୟମକୁ ସେ ଏହି ସୂଚନା ଦେଇଛନ୍ତି। କେନ୍ଦ୍ର ଖଣି ସଚିବ କହିଛନ୍ତି, ରାଜ୍ୟ ସରକାରଙ୍କ ଖଣି ନିଲାମ ସଂକ୍ରାନ୍ତ ପଦକ୍ଷେପ ପ୍ରଶଂସନୀୟ। ଏବର୍ଷ ରାଜ୍ୟ ସରକାର ପ୍ରାୟ ୧୭/୧୮ଟି ଖଣି ନିଲାମ କରିବାକୁ ଲକ୍ଷ୍ୟ ରଖିଛନ୍ତି। ଏହି ଖଣି ମଧ୍ୟରେ ଲୁହାପଥର, ମାଙ୍ଗାନିଜ ଓ ଚୂନ ପଥର ଖଣି ରହିଛି। ଖଣି ଓ ଖଣିଜଦ୍ରବ୍ୟ ଉତ୍ତୋଳନ ଆଇନକୁ ଓଡ଼ିଶା ସରକାର ସଠିକ ଭାବେ କାର୍ଯ୍ୟକାରୀ କରୁଛନ୍ତି। ନୂଆ ଏମଏମଡିଆର ଆଇନ ଆସିବା ପରେ ଛତିଶଗଡ଼, ଝାଡ଼ଖଣ୍ଡ, ମଧ୍ୟପ୍ରଦେଶ ପରି ଅନେକ ରାଜ୍ୟ ଖଣି କାରବାରରେ ସଫଳତା ପାଇଛନ୍ତି। ନାଲକୋ ୬୦୦ କୋଟିରୁ ଊର୍ଦ୍ଧ୍ବ ଟଙ୍କାର ଖଣି କାରବାର କରିପାରିଛି। ଓଡ଼ିଶାରେ ଜିଲା ଖଣିଜ ପାଣ୍ଠିରେ ପ୍ରାୟ ୫ହଜାର କୋଟିରୁ ଅଧିକ ଟଙ୍କା ଅଛି। ରାଜ୍ୟ ସରକାର ଏହାର ସଠିକ ପରିଚାଳନା କରୁଥିବା ସେ ପ୍ରକାଶ କରିଛନ୍ତି।