ଡେସ୍କ : ଭାରତୀୟ ରେଡକ୍ରସ ସୋସାଇଟି, ଓଡ଼ିଶା ରାଜ୍ୟ ଶାଖା ଦ୍ୱାରା ପରିଚାଳିତ ‘ସହାୟ’ ମାନସିକ ଅନଗ୍ରସର ପିଲାଙ୍କ ସ୍ୱତନ୍ତ୍ର ବିଦ୍ୟାଳୟରେ ବିଶ୍ୱ ମାନସିକ ସ୍ୱାସ୍ଥ୍ୟ ସପ୍ତାହ ପାଳନ ଅବସରରେ ଗୁରୁବାର ଦିନ ଏକ ସଚେତନତା ସଭା ଅନୁଷ୍ଠିତ ହୋଇ ଯାଇଛି ।
ଏଥିରେ ସ୍ଥାନୀୟ ଶ୍ରୀରାମଚନ୍ଦ୍ର ଭେଷଜ ଚିକିତ୍ସା ମହାବିଦ୍ୟାଳୟ, ମାନସିକ ସ୍ୱାସ୍ଥ୍ୟ ଅନୁଷ୍ଠାନର ମନସ୍ତତ୍ୱ ଚିକତ୍ସକ ଡାକ୍ତର ପ୍ରଶାନ୍ତ କୁମାର ସେଠୀ ଓ ତପସ୍ୱିନୀ ବରାଳ ବକ୍ତା ଭାବେ ଯୋଗଦେଇ ମାନସିକ ସ୍ୱାସ୍ଥ୍ୟର ସଂଜ୍ଞା, କାରଣ ଓ ନିରାକରଣ ଉପରେ ବିସ୍ତୃତ ଭାବେ ଆଲୋଚନା କରିଥିଲେ । ‘ସହାୟ’ର ସଙ୍ଗୀତ ଶିକ୍ଷକ ଯୁଧିଷ୍ଠିର ପତ୍ରି ସୁସ୍ଥ ମାନସିକ ସ୍ୱାସ୍ଥ୍ୟ ପାଇଁ ସଙ୍ଗୀତର ଭୂମିକା ବିଷୟରେ ଆଲୋଚନା କରିଥିଲେ । ଏହି ସଭାରେ ବିଶ୍ୱ ମାନସିକ ସ୍ୱାସ୍ଥ୍ୟ ସପ୍ତାହ ଉପଲକ୍ଷେ ଚଳିତ ବର୍ଷର ବିଷୟବସ୍ତୁ ‘ମାନସିକ ସ୍ୱାସ୍ଥ୍ୟ ଓ ସାର୍ବଭୌମିକ ଅଧିକାର’ର ଲକ୍ଷ୍ୟ ଉପରେ ଆଲୋଚନା କରାଯାଇଥିଲା । କଟକ ସହରର ବିଭିନ୍ନ ପ୍ରାଥମିକ ବିଦ୍ୟାଳୟର ଶିକ୍ଷକ ଓ ଦିବ୍ୟାଙ୍ଗ ପିଲାମାନଙ୍କର ଅଭିଭାବକମାନେ ଅଂଶ ଗ୍ରହଣ କରିଥିଲେ ।
ମାନସିକ ଅନଗ୍ରସର ପିଲାଙ୍କ ସ୍ୱତନ୍ତ୍ର ବିଦ୍ୟାଳୟ ‘ସହାୟ’ର ଅବୈତନିକ ସଚିବ ଶ୍ରୀମତୀ ମୃଣାଳିନୀ ପାଢୀଙ୍କ ପରିଚାଳନାରେ ଏହି ସଭା ଅନୁଷ୍ଠିତ ହୋଇଥିଲା । ‘ସହାୟ’ର ସମସ୍ତ ଶିକ୍ଷକ-ଶିକ୍ଷୟିତ୍ରୀ ଓ କର୍ମଚାରୀମାନେ ଏଥିରେ ଯୋଗ ଦେଇଥିଲେ ।
