ମୁମ୍ବଇ: ମୁମ୍ବଇରେ ମୌସୁମୀ ବାୟୁ ପ୍ରବେଶ କରିବା ପରେ ପ୍ରାୟ ସପ୍ତାହେ ଧରି ଲଗାଣ ବର୍ଷା ଜାରି ରହିଛି। ଫଳରେ ସହରର ବହୁ ଅଞ୍ଚଳ ଜଳାର୍ଣ୍ଣବ ହୋଇପଡ଼ିଛି। ବର୍ଷା ଯୋଗୁ ସାଧାରଣ ଜୀବନଯାତ୍ରା ପ୍ରଭାବିତ ହୋଇଥିବାବେଳେ ଅନେକ ଅଞ୍ଚଳରେ ଲୋକେ ଜଳବନ୍ଦୀ ଅବସ୍ଥାରେ ରହିଛି। ସିଅନ, ଦାଦରର ହିନ୍ଦମାତା ଏବଂ ଗାନ୍ଧୀନଗର ଓ ସଣ୍ଟାକ୍ରୁଜ ଅଞ୍ଚଳ ସବୁଠାରୁ ଅଧିକ ପ୍ରଭାବିତ ହୋଇଛି। ତେବେ ସହରରେ ଆହୁରି ୨୪ ଘଣ୍ଟା ପ୍ରବଳରୁ ଅତି ପ୍ରବଳ ବର୍ଷା ହେବ ବୋଲି ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଥିବାରୁ ମୁମ୍ବଇବାସୀ ଚିନ୍ତାରେ ପଡ଼ିଯାଇଛନ୍ତି।
ବର୍ଷା ସତ୍ବେ ସହରରେ ଲୋକାଲ ଟ୍ରେନ ଚଳାଚଳ ଜାରି ରହିଛି। ପାଲଘର ଅଞ୍ଚଳରେ ରେଲୱେ ଟ୍ରାକ ଉପରେ ୨/୩ ଫୁଟ ଉଚ୍ଚର ବର୍ଷାଜଳ ଜମି ରହିଥିବାରୁ ସୋମବାର ସକାଳେ ୧୦ଟି ଦୂରଗାମୀ ଟ୍ରେନକୁ ବାତିଲ କରାଯାଇଥିଲା। ଜାମବ୍ରଙ୍ଗ ଏବଂ ଠାକୁରୱାରି ମଧ୍ୟରେ ଏକ ମାଲବାସୀ ଟ୍ରେନ ଲାଇନଚ୍ୟୁତ ହେବାରୁ ଏପରି ନିଷ୍ପତ୍ତି ହୋଇଥିଲା। ତେବେ ପାଣି ଛାଡ଼ିବା ପରେ ଦୂରଗାମୀ ଟ୍ରେନ ଚଳାଚଳ ଆରମ୍ଭ ହୋଇଥିବା ସୂଚନା ମିଳିଛି। କିନ୍ତୁ ମାଲଗାଡ଼ି ଲାଇନଚ୍ୟୁତ ହେବା ଯୋଗୁ ପୁଣେ ଯାଉଥିବା ସମସ୍ତ ଟ୍ରେନକୁ ବାତିଲ କରାଯାଇଛି।
ସେହିପରି ବର୍ଷା ଯୋଗୁ ଅନେକ ସ୍ଥାନରେ ଟ୍ରାଫିକ ସମସ୍ୟା ସୃଷ୍ଟି ହୋଇଛି। ଗାନ୍ଧୀ ମାର୍କେଟ ଅଞ୍ଚଳ ସମ୍ପୂର୍ଣ୍ଣ ଜଳାର୍ଣ୍ଣବ ହୋଇପଡ଼ିବାରୁ ଗାଡ଼ି ଚଳାଚଳ ବନ୍ଦ ରହିଛି। ସେହିପରି ପଶ୍ଚିମ ବାନ୍ଦ୍ରାରେ ଏସ.ଭି ରୋଡ୍ର ନ୍ୟାଶନାଲ କଲେଜ ନିକଟରେ ଅନୁରୂପ ସମସ୍ୟା ଯୋଗୁ ଯାତାୟାତ ବନ୍ଦ ରହିଛି। ହିନ୍ଦମାତା ଅଞ୍ଚଳରେ ୪/୫ ଫୁଟ ଉଚ୍ଚରେ ପାଣି ଜମିଥିବାରୁ ଲୋକଙ୍କୁ ପାଦରେ ଚାଲି ଚାଲି ଯିବାକୁ ପ୍ରଶାସନ ପକ୍ଷରୁ ବାରଣ କରାଯାଇଛି। ବର୍ଷା ଯୋଗୁ ଯାତାୟାତ ବାଧାପ୍ରାପ୍ତ ହେଉଥିବାବେଳେ ଅନେକ ସ୍ଥାନରେ ରାସ୍ତାଜାମ ରହୁଛି। ବର୍ଷାଜଳରେ ଅନେକ ଦୁଇଚକିଆ ଯାନ ବୁଡ଼ିରହିଛି।
