ଲକ୍ଷ୍ନୌ : ୟୁପିର ବରେଲିରେ ବିଜେପିର ପୂର୍ବତନ ବିଧାୟକଙ୍କୁ ଠକିବାକୁ ଚେଷ୍ଟା କରିବା ଘଟଣା ସାମ୍ନାକୁ ଆସିଛି । ଫୋନ୍ କରି ନିଜକୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ବୋଲି ପରିଚୟ ଦେଇ ନିର୍ବାଚନରେ ଟିକେଟ୍ ଦେବା ବଦଳରେ ପଇସା ଠକିବା ପାଇଁ ଚେଷ୍ଟା କରିଥିଲା ଅଭିଯୁକ୍ତ । ସନ୍ଦେହ ହେବାରୁ ପୂର୍ବତନ ବିଧାୟକ ଥାନାରେ ଅଭିଯୋଗ କରିଥିଲେ । ଏହା ପରେ ସମ୍ପୂର୍ଣ୍ଣ ଘଟଣାର ପର୍ଦ୍ଦାଫାଶ ହୋଇଥିଲା । ଅଭିଯୁକ୍ତ ରବିନ୍ଦ୍ର ମୌର୍ଯ୍ୟକୁ ଗିରଫ କରିଛି ପୁଲିସ । ତାଙ୍କ ସହିତ ସାମିଲ ଥିବା ତାଙ୍କ ସାଙ୍ଗମାନଙ୍କୁ ଖୋଜୁଛି ପୁଲିସ । ରବିନ୍ଦ୍ର ନାଁରେ ପୂର୍ବରୁ ଚୋରି ଓ ଠକେଇର ଅନେକ ମାମଲା ରହିଛି ।
ପୁଲିସ ସୂଚନା ଅନୁସାରେ ରବିନ୍ଦ୍ର ମୌର୍ଯ୍ୟ ସର୍ବପ୍ରଥମେ ୪ ଜାନୁୟାରୀରେ ପୂର୍ବତନ ବିଧାୟକ କିଶନଲାଲ ରାଜପୁତଙ୍କୁ ଫୋନ୍ କରିଥିଲା । ସେବେଠୁ ୨୦ ଜାନୁୟାରୀ ଭିତରେ ସେ ସମୁଦାୟ ୯ ଥର ଫୋନ୍ କରିସାରିଥିଲା । କିଶନଲାଲ ରାଜପୁତ ପିଲିଭିତ ଜିଲାରୁ ବରଖେରା ବିଧାନସଭା ଆସନରୁ ବିଧାୟକ ରହିସାରିଛନ୍ତି । ତାଙ୍କ ପାଖକୁ ବାରମ୍ବାର ଫୋନ୍ ଆସେ ଏବଂ ଆଗାମୀ ନିର୍ବାଚନରେ ଟିକେଟ ଦେବାର ପ୍ରତିଶ୍ରୁତି ଦିଆଯାଏ । ଟ୍ରୁକଲରରେ ମଧ୍ୟ ନମ୍ବର ଗୃହମନ୍ତ୍ରୀ ବୋଲି ଦର୍ଶାଏ ।
କିନ୍ତୁ ସନ୍ଦେହ ହେବାରୁ ସେ ଥାନାରେ ଏନେଇ ଅଭିଯୋଗ କଲେ । ତେବେ ଅଭିଯୁକ୍ତ ଯେଉଁ ନମ୍ବରରୁ ଫୋନ୍ କରୁଥିଲା ସେହି ସିମ୍ ଗାଁର ହରିଶ ନାଁରେ ପଞ୍ଜୀକୃତ ଥିଲା । ଖୋଳତାଡ ପରେ ସବୁ ଜଣାପଡିଥିଲା । ସିମ ଗତ ଡିସେମ୍ବର ୨୯ରେ କିଣାଯାଇଥିଲା । ରବିନ୍ଦ୍ରକୁ ପଚରାଉଚରା କରିବା ପାଇଁ ପୁଲିସ ଥାନାକୁ ଡାକିବା ବେଳେ ସେ ସିମକୁ ଭାଙ୍ଗି ଦେଇଥିଲା । ତେବେ ପଚରାଉଚରାରେ ଶେଷରେ ସବୁ ମାନିଯାଇଥିଲା ରବିନ୍ଦ୍ର । ପୁଲିସ ତାକୁ ଗିରଫ କରି ଏଥିରେ ସାମିଲ ଥିବା ତା ସାଙ୍ଗମାନଙ୍କୁ ଖୋଜୁଛି ।
