ନୂଆଦିଲ୍ଲୀ : ଦେଶର ବିଭିନ୍ନ ନିମ୍ନ ଅଦାଲତରେ ବର୍ଷବର୍ଷ ଧରି ପଡ଼ିରହିଛି ୨୨ଲକ୍ଷରୁ ଅଧିକ ମାମଲା। ସୁପ୍ରିମକୋର୍ଟ ଦ୍ୱାରା ଗଠିତ ନ୍ୟାସନାଲ ଜୁଡିସିଆଲ ଡାଟା ଗ୍ରୀଡ୍(ଏନ୍ଜେଡିଜି) ତଥ୍ୟ ଅନୁସାରେ ଚଳିତ ମାସ ୧୭ତାରିଖ ସୁଦ୍ଧା ୧୦ବର୍ଷରୁ ଅଧିକ କାଳ ଧରି ବିଚାରାଧୀନ ରହିଥିବା ମାମଲା ସଂଖ୍ୟା ୨୨ଲକ୍ଷ ୯୦ହଜାର ୩୬୪। ଏଭୁଡ଼ିକ ସିଭିଲ ଓ ଅପରାଧ ମାମଲା। ଦେଶର ୨୪ ଉଚ୍ଚ ନ୍ୟାୟାଳୟକୁ ମିଶାଇଲେ ମୋଟ ଅଢ଼େଇ କୋଟି ମାମଲା ବିଚାରାଧୀନ ରହିଥିବାବେଳେ ନିମ୍ନ ଅଦାଲତର ଉପରୋକ୍ତ ମାମଲା ସଂଖ୍ୟା ୮.୨୯ପ୍ରତିଶତ। ସେଥିମଧ୍ୟରୁ ୫ଲକ୍ଷ ୯୭ହଜାର ୫୯୫ ସିଭିଲ ଓ ୧୬ଲକ୍ଷ ୯୨ହଜାର ୭୬୯ଅପରାଧ ମାମଲା ବୋଲି ଜଣାପଡ଼ିଛି। ଏହି ପରିପ୍ରେକ୍ଷୀରେ ପୁରୁଣା ମାମଲାଗୁଡ଼ିକର ଆବଶ୍ୟକ ଯାଞ୍ଚ ସହିତ ତୁରନ୍ତ ସମାଧାନ କରିବାକୁ କେନ୍ଦ୍ର ଆଇନ ମନ୍ତ୍ରଣାଳୟ ପକ୍ଷରୁ ହାଇକୋର୍ଟ ମୁଖ୍ୟ ବିଚାରପତିମାନଙ୍କୁ ଚିଠି ଲେଖାଯାଇଛି। ଏହାଛଡ଼ା ଫାଷ୍ଟ୍ରଟ୍ରାକ୍ କୋର୍ଟରେ ଏଗୁଡ଼ିକର ତ୍ୱରିତ ବିଚାର ଉପରେ ମଧ୍ୟ ଗୁରୁତ୍ୱାରୋପ କରାଯାଇଛି।
