ଖୁଣ୍ଟା: ମୟୁରଭଞ୍ଜ ଜିଲା ଖୁଣ୍ଟା ତହସିଲ ଅଧୀନ ସପଞ୍ଚୁଆ ପଞ୍ଚାୟତର ସୁବର୍ଣ୍ଣମଞ୍ଜରୀ ଗ୍ରାମ ନିକଟରେ ଶନିବାର କାର୍ଯ୍ୟରତ ବଡପଥରା ରାଜସ୍ୱ ନିରୀକ୍ଷକଙ୍କୁ ପଥର ମାଫିଆ ମାଡ ମାରି ମୁଣ୍ଡ ଫଟାଇ ଦେଇଥିବା ଜଣାପଡ଼ିଛି। ଘଟଣା ଅନୁସାରେ ବଡପଥରା ଆରଆଇ ଦୟାନିଧି ରାଉତ ସପଞ୍ଚୁଆ ଅଞ୍ଚଳର ନିଷିଦ୍ଧ ଅଞ୍ଚଳରୁ ବେଆଇନ ପଥର ଚାଲାଣ ହେଉଥିବା ବାବଦରେ ସୂଚନା ପାଇ ଶନିବାର ସକାଳେ ଯାଉଥିବାବେଳେ ସୁବର୍ଣ୍ଣମଞ୍ଜରୀ ଫରେଷ୍ଟ ବିଟ କାର୍ଯ୍ୟାଳୟ ନିକଟରେ ପଥର ମାଫିଆ ତାଙ୍କୁ ଆକ୍ରମଣ କରିଥିଲେ। ଆକ୍ରମଣରେ ତାଙ୍କର ମୁଣ୍ଡ ଫାଟିଯାଇଥିଲା । ଖବର ପାଇ ତହସିଲଦାର ଅଙ୍କୁର ଅଭିଳାଷ ଅନ୍ୟମାନଙ୍କ ସହ ପହଞ୍ଚି ଥିଲେ। ଆରଆଇଙ୍କୁ ଉଦ୍ଧାର କରାଯାଇ ଡୁକୁରା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି। ପ୍ରକାଶ ଯେ, ପୁଲିସ କୌଣସି କାରଣରୁ ଧାର୍ଯ୍ୟ ତାରିଖର ଦୁଇ ସପ୍ତାହ ପରେ ଗତ ଜୁଲାଇ ୧୭ ତାରିଖରେ ସପଞ୍ଚୁଆ ସମେତ ଅନ୍ୟ ୬ଟି ପଞ୍ଚାୟତର ପରିବେଶ ସମ୍ବେଦନଶୀଳ ଅଞ୍ଚଳର ପଥର ଖଦାନ ମାନଙ୍କରେ ୧୪୪ ଧାରା ଜାରି କରିଥିଲା। ବିଳମ୍ବ ସୁଯୋଗରେ ସେତେବେଳେ ମାଫିଆ ମାନେ ୧୪୪ ଜାରିହେବା ଭିତରେ ଦୁଇଥର ପଥର ବ୍ଲାଷ୍ଟିଂ କରିଥିଲେ। ପରଦିନ ତସହିଲ ପକ୍ଷରୁ ସୁବର୍ଣ୍ଣମଞ୍ଜରୀ ନାମକ ଅଞ୍ଚଳର ନିଷିଦ୍ଧ ଖଦାନ ନିକଟରୁ ଏକ ବହୁ ମୂଲ୍ୟବାନ କଂପ୍ରେସର ମେସିନ ଜବତ ହୋଇଥିଲା।
Comments are closed.