ନୂଆଦିଲ୍ଲୀ : କୋନ ବନେଗା କରୋଡପତି (କେବିସି)ର ୧୨ଶ ସଂସ୍କରଣକୁ ନେଇ ବିବାଦ ଦେଖାଯାଇଛି। ଏହି ଗୋମ୍ ସୋ’ର ଶୁକ୍ରବାର ଇପିସୋଡ୍ରେ ପଚରାଯାଇଥିବା ଏକ ପ୍ରଶ୍ନ ହିନ୍ଦୁ ଧର୍ମାବଲମ୍ବୀଙ୍କ ଭାବାବେଗକୁ ଆଘାତ ଦେଇଥିବା ଅଭିଯୋଗ କରାଯାଇଛି। ଗେମ୍ ସୋ’ର ଉଦ୍ଘୋଷକ ମେଗାଷ୍ଟାର ଅମିତାଭ ବଚ୍ଚନ ଓ ନିର୍ମାତାଙ୍କ ବିରୋଧରେ ଲକ୍ଷ୍ନୌରେ ମାମଲା ରୁଜୁ କରାଯାଇଛି।
ଏହି ଇପିସୋଡ୍ରେ ହଟ୍ ସିଟ୍ରେ ରହିଥିଲେ ସାମାଜିକ କର୍ମୀ ବେଜୱାଡା ୱିଲସସନ ଓ ଅଭିନେତା ଅନୂପ ସୋନୀ। ବିଗ୍ ବି ଅମିତାଭ ପ୍ରଶ୍ନ କରିଥିଲେ। ପ୍ରଶ୍ନର ମୂଲ୍ୟ ୬ଲକ୍ଷ ୪୦ହଜାର ଟଙ୍କା। ପ୍ରଶ୍ନଟି ଥିଲା ଡିସେମ୍ବର ୨୫, ୧୯୨୭ରେ ଡକ୍ଟର ଆମ୍ବେଦକର ଏବଂ ତାଙ୍କ ଅନୁଗତମାନେ କେଉଁ ଧର୍ମଗ୍ରନ୍ଥ ପୋଡିଥିଲେ। ପ୍ରଶ୍ନ ଉତ୍ତର ପାଇଁ ଅପସନ ରହିଥିଲା ୧-ବିଷ୍ଣୁ ପୁରାଣ, ୨-ଭଗବଦ୍ ଗୀତା, ୩-ଋକ୍ ବେଦ, ୪- ମନୁସ୍ମୃତି। ଉତ୍ତର ଥିଲା ମନୁସ୍ମୃତି। ଅମିତାଭ ବଚ୍ଚନ ହିନ୍ଦୀରେ ପ୍ରଶ୍ନର ଉତ୍ତର ଘୋଷଣା କରିବା ପୂର୍ବକ କହିଥିଲେ ଯେ ୧୯୨୭ରେ ଡକ୍ଟର ଆମ୍ବେଦକର ଓ ତାଙ୍କ ସହଯୋଗୀମାନେ ହିନ୍ଦୁ ଧର୍ମଗ୍ରନ୍ଥ ମନୁସ୍ମୃତିକୁ ନିନ୍ଦା କରିବା ସହିତ ଏହାର ନକଲକୁ ପୋଡିଥିଲେ। ଏହି ପ୍ରଶ୍ନକୁ ଅନେକ ଇଣ୍ଟରନେଟ୍ରେ ସେୟାର କରାଯାଇ ନଥିବା ବେଳେ ଚଳଚ୍ଚିତ୍ର ନିର୍ମାତା ବିବେକ ଅଗ୍ନିହୋତ୍ରୀ ଏହାକୁ ସୋୟାର କରିଛନ୍ତି। ଏହି ଘଟଣା ପରେ କେତେକ ଟ୍ବିଟର ବ୍ୟବହାରକାରୀ କେବିସି-୧୨କୁ ବର୍ଜନ କରିବା ଲାଗି ଘୋଷଣା କରିଛନ୍ତି।
