ଭୁବନେଶ୍ବର: ଭୁବନେଶ୍ବରରେ କମେଡ଼ି କିଙ୍ଗ୍ କପିଲ୍ ଶର୍ମା। ଡେଲିଭରୀ ବୟ ସାଜି ରାଜଧାନୀର ଗଳି କନ୍ଦିରେ ବୁଲୁଛନ୍ତି କପିଲ୍। ଏହା ଶୁଣି ଆପଣଙ୍କୁ ଆଶ୍ଚର୍ଯ୍ୟ ଲାଗୁଥିବା ନିଶ୍ଚୟ। ତେବେ ସତରେ ନୁହେଁ ବରଂ ଏକ ଫିଲ୍ମର ଶୁଟିଂ ପାଇଁ କପିଲ୍ ଏଭଳି ବେଶ ଧାରଣ କରିଛନ୍ତି। ତାଙ୍କର ଆଗାମୀ ପ୍ରୋଜେକ୍ଟ ପାଇଁ କପିଲ୍ ଭୁବନେଶ୍ବର ଆସିଛନ୍ତି। ନିର୍ଦେଶିକା ନନ୍ଦିତା ଦାସଙ୍କ ଆଗାମୀ ଚଳଚ୍ଚିତ୍ରର ଶୁଟିଂ ପାଇଁ କପିଲ୍ ଓ ପୁରା ଟିମ୍ ଭୁବନେଶ୍ବରରେ ପହଞ୍ଚିଛନ୍ତି। ଏଠାରେ ତାଙ୍କ ଶୁଟିଂ ଆରମ୍ଭ ହୋଇଯାଇଛି।
ସୂଚନା ମୁତାବକ, ନନ୍ଦିତାଙ୍କ ଏହି ଚଳଚ୍ଚିତ୍ରରେ ବଲିଉଡ଼ ଅଭିନେତା କପିଲ୍ ଶର୍ମା ମୁଖ୍ୟ ଭୂମିକାରେ ନଜର ଆସିବେ। ଏଥିରେ ସେ ଜଣେ ଖାଦ୍ୟ ଡେଲିଭରୀ ବୟ ଭୂମିକାରେ ଅଭିନୟ କରିଛନ୍ତି। ଶୁଟିଂ ସମୟର କିଛି ଫଟୋ ଓ ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହୋଇଛି। ଶାହାନା ଗୋସ୍ବାମୀ ଏଥିରେ କପିଲଙ୍କ ବିପକ୍ଷରେ ନାୟିକା ଭାବେ ନଜର ଆସିବେ ବୋଲି ଜଣାପଡ଼ିଛି। ଭୁବନେଶ୍ବରର ବିଭିନ୍ନ ରେଷ୍ଟୁରାଣ୍ଟ ଓ ପୁରୁଣା ସ୍ଥାନରେ ଫିଲ୍ମର କିଛି ଦୃଶ୍ୟର ଶୁଟିଂ ଚାଲିଛି।
ବର୍ତ୍ତମାନ ସୁଦ୍ଧା ଫିଲ୍ମର ନାଁ ଆନୁଷ୍ଠାନିକ ଭାବେ ଘୋଷଣା କରାଯାଇ ନାହିଁ। ତେବେ ଏହା ଡିଜିଟାଲ ପ୍ଲାଟଫର୍ମରେ ରିଲିଜ୍ ହେବ ବୋଲି ଜଣାପଡ଼ିଛି। କପିଲ୍ ସାମାଜିକ ଗଣମାଧ୍ୟମରେ ନନ୍ଦିତା ଓ ଟିମ୍ ସହ କିଛି ଫଟୋ ମଧ୍ୟ ଶେୟାର କରିଛନ୍ତି।
