ଇନ୍ଦୋର: ବିବାଦୀୟ ମନ୍ତବ୍ୟକୁ ନେଇ ସବୁବେଳେ ଚର୍ଚ୍ଚାରେ ରହୁଥିବା ବିଜେପିର ରାଷ୍ଟ୍ରୀୟ ସାଧାରଣ ସମ୍ପାଦକ କୈଳାସ ବିଜୟବର୍ଗୀୟ ଏଥର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ଟିପ୍ପଣୀ କରି ପୁଣି ଚର୍ଚ୍ଚାକୁ ଆସିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶଭକ୍ତି ନିଶାରେ ବିବାହ କରିନାହାନ୍ତି ବୋଲି ସେ କହିଛନ୍ତି। ତାଙ୍କର ଏହି ମନ୍ତବ୍ୟ ପରେ କଂଗ୍ରେସ ଯଶୋଦାବେନ୍ କିଏ ବୋଲି ପ୍ରଶ୍ନ କରିଛି।
ଇନ୍ଦୋରେ ନିଶା ବିରୋଧୀ ଅଭିଯାନରେ ଆୟୋଜିତ ଏକ ଗଣଦୌଡ଼ ଅବସରରେ କୈଳାସ ବିଜୟବର୍ଗୀୟ ଭାଷଣ ଦେଇ କହିଥିଲେ, ନିଶାରେ ରହିବା ଭଲ କଥା, କିନ୍ତୁ ଏହି ନିଶା ନିଜ କର୍ତ୍ତବ୍ୟ ଏବଂ ଦେଶଭକ୍ତିର ହେବା ଉଚିତ। ନିଶା ଏତେ ବି ନ ହେଉ, ଯାହା ଫଳରେ କେହି ମୋଦୀଙ୍କ ଭଳି ବିବାହ କରିବେ ନାହିଁ। ଦେଶଭକ୍ତି ନିଶାରେ ମୋଦୀ ବିବାହ କରିନାହାନ୍ତି ବୋଲି ସେ କହିଥିଲେ।
ବିଜୟବର୍ଗୀୟଙ୍କ ଏହି ମନ୍ତବ୍ୟକୁ ନେଇ ମଧ୍ୟପ୍ରଦେଶ କଂଗ୍ରେସ ନେତା ନରେନ୍ଦ୍ର ସାଲୁଜା ପ୍ରଶ୍ନ କରିଛନ୍ତି ଯେ, ଯଦି ମୋଦୀ ବିବାହ କରିନାହାନ୍ତି, ତେବେ ଯଶୋଦାବେନ କିଏ ? ମୋଦୀ ନିର୍ବାଚନ ସତ୍ୟପାଠରେ ଦେଇଥିବା ସତ୍ୟପାଠ କ’ଣ ମିଥ୍ୟା ? ଯଦି ଏହା ସତ୍ୟ ତେବେ ତାଙ୍କ ନିର୍ବାଚନ ରଦ୍ଦ ଘୋଷିତ ହେବା ଦରକାର ବୋଲି ସାଲୁଜା କହିଛନ୍ତି।
ସୂଚନାଯୋଗ୍ୟ, କୈଳାସ ବିଜୟବର୍ଗୀୟ କିଛିଦିନ ତଳେ ଇନ୍ଦୋରରେ ନାଗରିକତାର ପରିଚୟକୁ ନେଇ ଅଜବ ମନ୍ତବ୍ୟ ଦେଇଥିଲେ। ଏକ ସଭାରେ ସେ କହିଥିଲେ ଯେ, ଶ୍ରମିକମାନଙ୍କ ଚୂଡ଼ା ଉପମା ଖାଇବା ଷ୍ଟାଇଲରୁ ମୁଁ ବୁଝିଗଲି ଯେ ସେମାନେ ବାଂଲାଦେଶୀ। ଯେତେବେଳେ ମୁଁ ଶ୍ରମିକମାନଙ୍କ ସହିତ କଥା ହେଲି ସେତେବେଳେ ସେମାନେ ଏତକ ବି କହିପାରିଲେନି ଯେ ପଶ୍ଚିମବଙ୍ଗର କେଉଁ ଜିଲା କିମ୍ବା ଗାଁରେ ରହୁଛନ୍ତି।
