ଝୁମ୍ପୁରା: ଚମ୍ପୁଆ ଉପଖଣ୍ଡ ବାରିଆ ଥାନା ଅନ୍ତର୍ଗତ ଭୀମପୁର ଗ୍ରାମରେ ସୋମବାର ଅପରାହ୍ନରେ ବଜ୍ରପାତରେ ଜଣଙ୍କର ମୃତ୍ୟୁ ଘଟିଛି। ଏଥିସହ ଜଣେ ଆହତ ହୋଇଥିବା ଜଣାଯାଇଛି। ଭୀମପୁର ଗ୍ରାମର ଅବସରପ୍ରାପ୍ତ ପ୍ରଧାନ ଶିକ୍ଷକ ଶଶିଭୂଷଣ ନାଏକ(୬୨) ନିଜର ଚାଷ ଜମିରେ ପାୱାରଟିଲରରେ ହଳ କରୁଥିଲେ। ଏହି ସମୟରେ ବର୍ଷା ସହିତ ଘଡଘଡି ହୋଇଥିଲା। ଶଶିଭୂଷଣ ବର୍ଷା ଆସିବାରୁ ଗାଡ଼ି ଚାଳକ ରାଜେଶ କୁମାର ମହାନ୍ତ(୨୩)ଙ୍କୁ ବିଲରୁ ଗାଡି ଉଠାଇ ଆଣିବା ପାଇଁ କହିଥିଲେ। ଏହି ସମୟରେ ବଜ୍ରପାତ ହେବା ଫଳରେ ଶଶିଭୂଷଣ ସେହିଠାରେ ଟଳି ପଡ଼ିଥିଲେ ଏବଂ ପାୱାର ଟିଲର ଚାଳକ ଆହତ ହୋଇଥିଲେ। ଆହତ ଚାଳକଙ୍କୁ ସଙ୍ଗେ ସଙ୍ଗେ ସ୍ଥାନୀୟ ଜନସାଧାରଣଙ୍କ ସହାୟତାରେ ଭଣ୍ଡା ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ପ୍ରାଥମିକ ଚିକିତ୍ସା ପରେ ପାୱାର ଟିଲର ଚାଳକ ରାଜେଶଙ୍କ ଚେତା ଫେରିଥିବା ଜଣାଯାଇଛି। ଅବସରପ୍ରାପ୍ତ ଶିକ୍ଷକଙ୍କ ବ୍ରଜପାତରେ ମୃତ୍ୟୁ ହୋଇଥିବା ଖବର ପାଇ ବହୁ ଶିକ୍ଷକ ସେଠାରେ ପହଞ୍ଚିଥିବା ଦେଖିବାକୁ ମିଳିଥିଲା। ସେ ଜଣେ ଛାତ୍ରବତ୍ସଳ ଆଦର୍ଶ ଶିକ୍ଷକ ଥିବାରୁ ବହୁ ପୁରାତନ ଛାତ୍ରଛାତ୍ରୀ ତାଙ୍କୁ ଶେଷ ଦର୍ଶନ କରିବା ପାଇଁ ତାଙ୍କ ବାସଭବନରେ ପହଞ୍ଚିଥିବା ଦେଖିବାକୁ ମିଳିଥିଲା।
Comments are closed.