ଜାମ୍ମୁ : ଜାମ୍ମୁ-କାଶ୍ମୀରର ସୋପିଆନ ଜିଲାରେ ମଙ୍ଗଳବାର ସୁରକ୍ଷାକର୍ମୀଙ୍କ ସହିତ ଗୁଳିବିନିମୟରେ ୪ ଆତଙ୍କବାଦୀ ପ୍ରାଣ ହରାଇଛନ୍ତି। ପ୍ରାଣ ହରାଇଥିବା ଆତଙ୍କବାଦୀଙ୍କ ମଧ୍ୟରୁ ଜଣେ ହେଉଛନ୍ତି ସାମସୁଲ୍ ମେଙ୍ଗନୁନ୍। ସାମସୁଲ୍ ହେଉଛନ୍ତି ୨୦୧୨ ବ୍ୟାଚ ଆଇପିଏସ୍ ଅଫିସର ଇମାନୁଲ ହକ୍ ମେଙ୍ଗନୁନଙ୍କ ସାନ ଭାଇ। ସାମସୁଲ୍ ୟୁନାନିରେ ବ୍ୟାଚଲର ଡିଗ୍ରୀ କରୁଥିଲେ। ତେବେ ସେ ପରବର୍ତ୍ତୀ ସମୟରେ ଆତଙ୍କବାଦୀ ସଂଗଠନରେ ସାମିଲ ହୋଇଥିଲେ। ପୁଲିସ ଅଧିକାରୀଙ୍କ କହିବା ଅନୁଯାୟୀ ସୋପିଆନର ଡ୍ରାଗୁଡ ଗ୍ରାମରେ ଆତଙ୍କବାଦୀଙ୍କ ଉପସ୍ଥିତି ସମ୍ପର୍କରେ ସୂଚନା ମିଳିବା ପରେ ପୁଲିସ ଓ ସେନା ପକ୍ଷରୁ ତଲାସ ଅଭିଯାନ ହୋଇଥିଲା। ଅଭିଯାନ ବେଳେ ଉଭୟ ପକ୍ଷ ମଧ୍ୟରେ ଗୁଳିବିନିମୟ ହୋଇଥିଲା। ପ୍ରାୟ ୭ଘଣ୍ଟାର ଗୁଳିବିନିମୟ ପରେ ୪ ଆତଙ୍କବାଦୀ ନିହତ ହୋଇଥିଲେ। ଆତଙ୍କବାଦୀଙ୍କ ଠାରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ଜବତ କରାଯାଇଛି।
