ନୂଆଦିଲ୍ଲୀ : ବଲିଉଡ୍ର ଖ୍ୟାତନାମା ଗୀତିକାର ଏବଂ ସଂଳାପ ଲେଖକ ‘ଜଲିସ୍ ସେରୱାନୀ’ଙ୍କର ପରଲୋକ ହୋଇଯାଇଛି। ଅନେକ ଦିନ ହେବ ସେ ରୋଗରେ ପୀଡିତ ଥିଲେ। ଚିକିତ୍ସା ଚାଲିଥିବା ସମୟରେ ବୁଧବାର ତାଙ୍କର ମୃତ୍ୟୁ ଘଟିଛି। ‘ଜଲିସ୍ ସେରୱାନୀ’ ହିନ୍ଦୀ ଚଳଚ୍ଚିତ୍ର ସଂଳାପ ଲେଖକ ସଂଘର ଅଧ୍ୟକ୍ଷ ରହିଥିଲେ। ଜଣେ ଉଚ୍ଚକୋଟିର ସଂଳାପ ଲେଖକ ଭାବେ ସେ ବେଶ୍ ଜଣାଶୁଣା ଥିଲେ।
ସେ ପ୍ରତିଘାତ, କନ୍ୱରଲାଲ୍, ସଂଗ୍ରାମ, ଏକ୍ ଥା ରାଜା, ମାଫିଆ ଭଳି ଚଳଚ୍ଚିତ୍ରରେ ସଂଳାପ ରଚନା କରିଥିଲେ। ଖାଲି ସେତିକି ନୁହେଁ ସେ ସଲମାନ୍ ଖାନ୍ଙ୍କ ଅନେକ ଚଳଚ୍ଚିତ୍ରରେ ସଂଳାପ ଏବଂ ଗୀତ ରଚନା କରିଥିଲେ। ଜଲିସ୍ ସେରୱାନୀ ସଲମାନ୍ ଅଭିନୀତ ଚଳଚ୍ଚିତ୍ର ‘ତୁମକୋ ନା ଭୁଲ ପାଏଙ୍ଗେ’, ‘ହମ୍ ତୁହ୍ମାରେ ହୈ ସନମ୍’, ‘ଦବଙ୍ଗ’, ‘ଦବଙ୍ଗ-୨’, ‘ୱାଣ୍ଟେଡ୍’, ‘ହ୍ୟାଲୋ ବ୍ରଦର’ ଏବଂ କିଛିଦିନ ତଳେ ମୁକ୍ତିଲାଭ କରିଥିବା ‘ଟାଇଗର ଜିନ୍ଦା ହେ’ ଭଳି ଚଳଚ୍ଚିତ୍ରରେ ଗୀତ ରଚନା କରିଥିଲେ। ଉତ୍ତର ପ୍ରଦେଶର ବାସିନ୍ଦା ‘ଜଲିସ୍ ସେରୱାନୀ’ ବହୁତ ଦିନ ହେବ ମୁମ୍ବଇରେ ରହି ଗୀତ ରଚନା କରିବା ସହ ଚଳଚ୍ଚିତ୍ର ପାଇଁ ସଂଳାପ ଲେଖୁଥିଲେ।