ଅହମ୍ମଦାବାଦ: ଆଇପିଏଲ୍ ଫାଇନାଲରେ ଗୁଜରାଟ ଟାଇଟାନ୍ସକୁ ୫ ୱିକେଟରେ ହରାଇ ୫ମ ଆଇପିଏଲ୍ ଟ୍ରଫି ଜିତିପାରିଛି ଚେନ୍ନଇ ସୁପର କିଙ୍ଗ୍ସ (ସିଏସ୍କେ)। ଦଳର ଏହି ବିଜୟ ପରେ ଅଧିନାୟକ ମହେନ୍ଦ୍ର ସିଂହ ଧୋନି କହିଛନ୍ତି ଯେ ଆଇପିଏଲ୍ରୁ ଅବସର ନେବାର ଏହା ପ୍ରକୃଷ୍ଟ ସମୟ। ହେଲେ ପ୍ରଶଂସକଙ୍କ ପାଇଁ ସେ ଆଉ ଏକ ସଂସ୍କରଣ ଚାହାନ୍ତି। କାରଣ ସାରାଦେଶରେ ପ୍ରଶଂସକମାନେ ଯେପରି ସ୍ନେହ ଓ ଭଲପାଇବା ଦେଖାଇଛନ୍ତି; ତାହା ଦେଖି ଆଉ ବର୍ଷେ ଆଇପିଏଲ୍ ଖେଳିବାକୁ ସେ ମନ ବଳାଇଛନ୍ତି।
ରୋମାଞ୍ଚକର ଫାଇନାଲରେ ଶେଷ ବଲ୍ରେ ବିଜୟ ପେର ଧୋନି କହିଥିଲେ, ପରିସ୍ଥିତିକୁ ଦେଖିଲେ ଏହା ଅବସର ନେବାର ଶ୍ରେଷ୍ଠ ସମୟ। ଧନ୍ୟବାଦ ଜଣାଇ ଅବସର ନେବା ମୋ ପାଇଁ ସହଜ ହେବ। ହେଲେ କଷ୍ଟକର ବ୍ୟାପାର ହେବ ଆଗାମୀ ୯ ମାସ କଠିନ ପରିଶ୍ରମ କରି ଆଉ ଏକ ସଂସ୍କରଣ ଖେଳିବାକୁ ପ୍ରୟାସ କରିବା। ପୁଣି ମୋ ଶରୀର ମଧ୍ୟ ଏଥିପାଇଁ ପ୍ରସ୍ତୁତ ହେବା ଆବଶ୍ୟକ। ତେବେ ସିଏସ୍କେ ପ୍ରଶଂସକଙ୍କଠାରୁ ଏତେ ଭଲପାଇବା ପାଇଛି; ଆଉ ଏକ ସଂସ୍କରଣ ଖେଳିବା ସେମାନଙ୍କ ପାଇଁ ମୋର ଉପହାର ହେବ। ମୋ ପ୍ରତି ସେମାନଙ୍କ ସ୍ନେହ ଓ ଭାବପ୍ରବଣତା ଦେଖି ସେମାନଙ୍କ ପାଇଁ ଏହା କରିବାକୁ ଚାହେଁ। ଏହା ମୋ କ୍ରିକେଟ୍ ଜୀବନର ଅନ୍ତିମ ପର୍ଯ୍ୟାୟ। ଫାଇନାଲରେ ପୂରା ଷ୍ଟାଡିୟମ୍ ମୋ ନାମ ଧରି ଚିତ୍କାର କରୁଥିଲେ। ଚେନ୍ନଇରେ ତ ଆହୁରି ଅଧିକ ଭଲପାଇବା ପାଇଛି। ତେଣୁ ଏଠାକୁ ଫେରି ଆଉ କିଛି କ୍ରିକେଟ୍ ଖେଳିବାକୁ ଚାହେଁ। ମୋ କ୍ରିକେଟ୍ ଶୈଳୀ ଏପରି ଯେ ପ୍ରଶଂସକ ଭାବୁଛନ୍ତି ଆସନ୍ତା ବର୍ଷ ଏପରି ଖେଳିପାରିବି।
Comments are closed.