ନୂଆଦିଲ୍ଲୀ : ବିଶ୍ୱ ନବସୃଜନ ସୂଚୀ ୨୦୧୯ (ଗ୍ଲୋବାଲ ଇନୋଭେସନ ଇଣ୍ଡେକ୍ସ-୨୦୧୯)ରେ ୫ଟି ସ୍ଥାନ ଉପରକୁ ଉଠି ଭାରତ ୫୨ ନମ୍ବର ସ୍ଥାନରେ ପହଞ୍ଚିଛି। ୨୦୧୮ରେ ଭାରତ ଏହି ତାଲିକାର ୫୭ ନମ୍ବର ସ୍ଥାନରେ ଥିଲା। ଏଥିରୁ ଭାରତ ନବସୃଜନ କ୍ଷେତ୍ରରେ ଅଗ୍ରଗତି କରିଥିବା ସ୍ପଷ୍ଟ ହୋଇଛି।
ସୂଚନା ଓ ପ୍ରଯୁକ୍ତି ବିଦ୍ୟା (ଆଇଟି) କ୍ଷେତ୍ରରେ ଭାରତର ପ୍ରଦର୍ଶନ ବହୁତ ଭଲ ରହିଛି। ରିପୋର୍ଟ ଅନୁସାରେ ଭାରତ ମାଧ୍ୟମିକ ଶିକ୍ଷାରୁ ନେଇ ବିଶ୍ୱବିଦ୍ୟାଳୟସ୍ତରରେ ଶିକ୍ଷାଗ୍ରହଣ କରୁଥିବା ଛାତ୍ରଛାତ୍ରୀଙ୍କ ମାମଲାରେ ଅଗ୍ରଗତି କରିଛି। ବିଜ୍ଞାନ ଏବଂ ଇଂଜିନିୟରିଂ ଶିକ୍ଷାରେ ଗ୍ରାଜୁଏଟ ପ୍ରସ୍ତୁତ କରିବା ମାମଲାରେ ମହତ୍ୱପୂର୍ଣ୍ଣ ପ୍ରଗତି ଘଟିଛି। ବୈଷୟିକ ଶିକ୍ଷାରେ ବେଙ୍ଗାଲୁରୁ, ମୁମ୍ବଇ ଏବଂ ଦିଲ୍ଲୀ ଶୀର୍ଷରେ ରହିଛନ୍ତି। ଗ୍ଲୋବାଲ ଇନୋଭେସନ ଇଣ୍ଡେକ୍ସ (ଜିଆଇଆଇ) ତାଲିକାର ପ୍ରଥମ ସ୍ଥାନରେ ରହିଛି ସ୍ୱିଜରଲାଣ୍ଡ। ଏହାପଛକୁ ସ୍ୱିଡେନ, ଆମେରିକା ଏବଂ ନେଦରଲାଣ୍ଡ ଯଥାକ୍ରମେ ଦ୍ୱିତୀୟ, ତୃତୀୟ ଏବଂ ଚତୁର୍ଥ ସ୍ଥାନରେ ରହିଛନ୍ତି। ବୁଧବାର ଦିଲ୍ଲୀଠାରେ କେନ୍ଦ୍ର ମନ୍ତ୍ରୀ ପିୟୁଷ ଗୋଏଲ ଏବଂ ୱାର୍ଲ୍ଡ ଇଣ୍ଟେଲେକଚୁଆଲ ପ୍ରପର୍ଟି ସଂଗଠନ ପ୍ରମୁଖ ଫ୍ରାନ୍ସିସ ଗ୍ୟାରି ଏହି ରିପୋର୍ଟକୁ ପ୍ରକାଶ କରିଥିଲେ।
ମହାଦେଶ ହିସାବରେ ଉତ୍ତର ଆମେରିକା ନବସୃଜନରେ ପ୍ରଥମ ସ୍ଥାନରେ ରହିଛି। ଉଚ୍ଚ ଆୟବର୍ଗ ମାମଲାରେ ସ୍ୱିଜରଲାଣ୍ଡ ପ୍ରଥମ ଏବଂ ଉଚ୍ଚ-ମଧ୍ୟମ ଆୟ ବର୍ଗ ଶ୍ରେଣୀରେ ଅଭିନବୀକରଣରେ ଚୀନ ପ୍ରଥମ ସ୍ଥାନରେ ରହିଛି। ଦକ୍ଷିଣ-ପୂର୍ବ ଏସିଆରେ ନବସୃଜନରେ ସିଂଗାପୁର ପ୍ରଥମ ସ୍ଥାନରେ ରହିଛି।
Comments are closed.