ନୂଆଦିଲ୍ଲୀ: ବେନାମୀ ସମ୍ପତ୍ତି ମାମଲାରେ ଆୟକର ବିଭାଗ ସୋମବାର କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ଜ୍ଵାଇଁ ତଥା କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସ୍ବାମୀ ରବର୍ଟ ଭଦ୍ରାଙ୍କ ବୟାନ ରେକର୍ଡ କରିଛି। ପୂର୍ବଦିଲ୍ଲୀର ସୁଖଦେବ ବିହାରରେ ଥିବା ଭଦ୍ରାଙ୍କ କାର୍ଯ୍ୟାଳୟରେ ଆୟକର ଅଧିକାରୀମାନେ ପହଞ୍ଚି ତାଙ୍କ ବୟାନ ରେକର୍ଡ କରିଥିବା ସୂଚନା ମିଳିଛି।
ଆୟକର ବିଭାଗ ପକ୍ଷରୁ ଭଦ୍ରାଙ୍କ ବୟାନ ରେକର୍ଡ ପାଇଁ ପୂର୍ବରୁ ସମନ୍ ଜାରି କରାଯାଇଥିଲା। କିନ୍ତୁ ସେତେବେଳେ ଭଦ୍ରା କରୋନା ମହାମାରୀ ଯୋଗୁ ବୟାନ ରେକର୍ଡ କରାଇ ନ ଥିଲେ। ପ୍ରବର୍ତ୍ତନ ନିର୍ଦେଶାଳୟ (ଇଡି) ବି ଗତବର୍ଷ ଜୁଲାଇରେ ଭଦ୍ରାଙ୍କ ଘନିଷ୍ଠ ତଥା ଅସ୍ତ୍ରଶସ୍ତ୍ର ବ୍ୟବସାୟୀ ସଞ୍ଜୟ ଭଣ୍ଡାରୀଙ୍କ ବିରୋଧରେ ଆର୍ଥିକ ଅନିୟମିତତା ମାମଲା ରୁଜୁ କରିଥିଲା।
ସୂଚନା ଅନୁସାରେ, ଭଦ୍ରାଙ୍କର ଲଣ୍ଡନରେ ପ୍ରାୟ ୧୨ ନିୟୁତ ପାଉଣ୍ଡ ମୂଲ୍ୟର ବେନାମୀ ସମ୍ପତ୍ତି ରହିଛି। ୨୦୧୮ରେ ଏହି ସମ୍ପତ୍ତିକୁ ନେଇ ମାମଲା ରୁଜୁ ହୋଇଥିଲା। ଇଡି ପକ୍ଷରୁ ପୂର୍ବରୁ ଭଦ୍ରାଙ୍କୁ ଜେରା କରାଯାଇଥିଲା। ରାଜନୈତିକ ପ୍ରତିଦ୍ବନ୍ଦ୍ବିତା ହେତୁ ତାଙ୍କ ବିରୋଧରେ ଏହି ମାମଲା ରୁଜୁ କରାଯାଇଥିବା ଭଦ୍ରା କହିଥିଲେ।
୨୦୧୫ ସେପ୍ଟେମ୍ବରରେ ବି ଭଦ୍ରାଙ୍କ ନାମରେ ଆର୍ଥିକ ଅନିୟମିତା ମାମଲା ରୁଜୁ ହୋଇଥିଲା। ଏଥିରେ ଅଭିଯୋଗ କରାଯାଇଥିଲା ଯେ, ଭଦ୍ରାଙ୍କ କମ୍ପାନୀ ସାଏଲାଇଟ ହସ୍ପିଟାଲିଟି ରାଜସ୍ଥାନର ବିକାନେର ଅଞ୍ଚଳରେ ଶସ୍ତାରେ ୬୯.୫୫ ହେକ୍ଟର ଜମି କିଣି ତାହାକୁ ବେଆଇନ କାରବାର ଜରିଆରେ ଏଲେଗ୍ନେରୀ ଫିନଲିଜ୍କୁ ୫.୧୫ କୋଟି ଟଙ୍କାରେ ବିକ୍ରି କରିଥିଲେ।
