ନୂଆଦିଲ୍ଲୀ: ତିନ ଦିନ ଧରି ହିମାଚଳ ପ୍ରଦେଶରେ ମୂଷଳଧାରର ବର୍ଷା ଯୋଗୁଁ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଫଳରେ ବିଭିନ୍ନ ସ୍ଥାନରେ ୧୫୦୦ରୁ ଅଧିକ ଲୋକ ଫସି ରହିଛନ୍ତି । ପ୍ରଭାବିତ ଅଞ୍ଚଳରୁ ଲୋକଙ୍କୁ ସୁରକ୍ଷିତ ଭାବେ ଉଦ୍ଧାର ପାଇଁ ବାୟୁସେନାର ୩ଟି ହେଲିକପ୍ଟର ନିୟୋଜିତ କରାଯାଇଛି। ମୁଖ୍ୟମନ୍ତ୍ରୀ ସି.ଏମ୍ ଜୟରାମ କୁଲ୍ଲୁ ରିଲିଫ ଓ ଉଦ୍ଧାରକାର୍ଯ୍ୟ ତଦାରଖ କରିବା ସହ ତ୍ବରାନ୍ବିତ କରିବାକୁ ପ୍ରଶାସନିକ ଅଧିକାରୀଙ୍କ ସହ ବୈଠକ କରିଛନ୍ତି।
ମୁଖ୍ୟମନ୍ତ୍ରୀ ସଡକ, ବିଦ୍ୟୁତ୍ ଓ ପାନୀୟ ଜଳ ବ୍ୟବସ୍ଥାକୁ ତୁରନ୍ତ ମରାମତି କରିବାକୁ ନିର୍ଦେଶ ଦେଇଛନ୍ତି । ନିଖୋଜ ୫୦ ପର୍ବତାରୋହୀଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ସେମାନେ ଲାହୋଲ-ସ୍ପିତି ଜିଲାର ସେସୁ କ୍ଷେତ୍ରରେ ସୁରକ୍ଷିତ ଥିବା ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି । ସେହିପରି ପିଙ୍ଗଦାମ ଲାରେ ଫସି ରହିଥିବା ଦୁଇ ଜଣ ଜର୍ମାନୀ ନାଗରିକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି ।
ଏହିପରି ପ୍ରବଳ ତୁଷାରପାତ ଯୋଗୁଁ ସର୍କୁଠାରୁ କେଲାଙ୍ଗ ମଧ୍ୟରେ ୭୦ ଜଣ ବୌଦ୍ଧ ସନ୍ୟାସୀ ସମତେ ୩୦୦ ଜଣ ଫସି ରହିଛନ୍ତି । ଅନୁରୂପ ଭାବେ ଚନ୍ଦ୍ରତାଳ ହ୍ରଦ ଦେଖିବାକୁ ଆସିଥିବା ଆଇଆଇଟିର ୫ଜଣ ଛାତ୍ର ଏବଂ ଚମ୍ବାର ହୋଲିରେ ଖେଳକୁଦ ପ୍ରତିଯୋଗିତାରେ ଭାଗ ନେବାକୁ ଆସିଥିବା ୮୧୬ ଛାତ୍ରଛାତ୍ରୀଙ୍କ ସମେତ ୧୨୦୦ ଲୋକ ଫସି ରହିଥିବା ସୂଚନା ମିଳିଛି । ଭାରତୀୟ ବାୟୁ ସେନା, ସ୍ଥାନୀୟ ପୁଲିସ୍, ବିପର୍ଯ୍ୟୟ ପ୍ରଶମନ ବିଭାଗ ଓ ସୁରକ୍ଷା ବାହିନୀ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି ।
