ହରଭଙ୍ଗା: ରାଜସ୍ୱ ଭରଣା ପାଇଁ ଜିଲ୍ଲା ପ୍ରଶାସନ ରକ୍ତମୁଖା କାର୍ଯ୍ୟାନୁଷ୍ଠାନରେ ସମସ୍ତେ ଅତିଷ୍ଠ ହେଲେଣି । ରାତିଅଧିଆ ବାଲି ଚୋରାଚାଲାଣ ଚଢଉର କିଛିଦିନ ନପୂରୁଣୁ ଏକ ଠିକାସଂସ୍ଥା ଗଦା କରିଥିବା ବାଲି ଉପରେ ଶୁକ୍ରବାର ଅପରାହ୍ନ ସମୟରେ ହରଭଙ୍ଗା ତହସିଲଦାର ଶମ୍ଭୁଭୂଷଣ ମିଶ୍ର, ସୁପରଭାଇଜର ନିଶିକାନ୍ତ ମେହେର, ପୁରୁଣାକଟକ ରାଜସ୍ୱ ନିରୀକ୍ଷକ ସଦଳବଳେ ଚଢଉ କରିଥିଲେ । ବାଲିଗଦା ମାପ୍ଚୁପ୍ କରିବା ସହିତ ରାଜସ୍ୱ ବିଭାଗ ଏହା ଉପରେ ଏକ ଲାଲ ଝଣ୍ଡା ପୋତିଥିବା ଜଣାପଡିଛି ।
ତହସିଲ ପ୍ରଶାସନ ପକ୍ଷରୁ ଏଭଳି କାର୍ଯ୍ୟାନୁଷ୍ଠାନକୁ ସ୍ୱାଗତ କରାଯାଉଛି । ମାତ୍ର ଏତେ ବିଳମ୍ବରେ ରାସ୍ତାକଡରେ ବାଲି ଗଦା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କେଉଁଠି ନା କେଉଁଠି ତହସିଲ ପ୍ରଶାସନର ଦୋଷ ଦୁର୍ବଳତାକୁ ପଦାରେ ପକାଇଛି । ଅନ୍ୟପଟେ ସମ୍ପୃକ୍ତ ଠିକାସଂସ୍ଥାକୁ କିଏ ଶହ ଶହ ଟ୍ରିପ ବାଲି ବିକ୍ରି କରିଛି ଏହାଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ବୁଦ୍ଧିଜୀବୀ ଏବଂ ସଚେତନ ନାଗରିକ ମହଲରୁ ଦାବି ଉଠୁଛି ।ଏହାର ପଙ୍ଖାନୁପଙ୍ଖ ତଦନ୍ତ କରାଯାଇ ଚୋରାରେ ବାଲିବିକ୍ରୀ କରିଥିବା ସଂସ୍ଥା ଉପରେ ମଧ୍ୟ କାର୍ଯ୍ୟାନୁଷ୍ଠାନ ନେବାକୁ ଦାବୀ ହୋଇଛି ।
ଏ ସର୍ମ୍ପକରେ ତହସିଲ ସୁପରଭାଇଜର ନିଶିକାନ୍ତ ମେହେରଙ୍କୁ ପଚାରିବାରୁ କଂରଜକଟା ବାଲିଗଦା ଜବତ କରାଯାଇଛି । ଆସେସମେଂଟ ପରେ ସମ୍ପୃକ୍ତ ଠିକାସଂସ୍ଥା ପକ୍ଷରୁ ରାଜସ୍ୱ ଆଦାୟ କରାଯିବ ବୋଲି କହିଛନ୍ତି । ବାଲି ଉପରେ ପ୍ରଶାସନର ଦାଉ ବର୍ତ୍ତମାନ ସମସ୍ତଙ୍କୁ ଘାଇଲାକରିଛି ।
Comments are closed.