ଗୁରୁଡିଝାଟିଆ: ପ୍ରଭୁ ଧବଳେଶ୍ୱରଙ୍କୁ ଦର୍ଶନ ଓ ଗଜଭୋଗ ନେବା ପାଇଁ ପୀଠରେ ନାହିଁ ନଥିବା ଭିଡ ଦେଖିବାକୁ ମିଳିଥିଲା । ପ୍ରାୟ ୨ କିଲୋମିଟର ପର୍ଯ୍ୟନ୍ତ ଧାଡିରେ ରହି ଘଣ୍ଟଘଣ୍ଟା ପର୍ଯ୍ୟନ୍ତ ଠିଆ ହୋଇ ରହିଥିଲେ ଶ୍ରଦ୍ଧାଳୁମାନେ। ପ୍ରଭୁ ଧବଳେଶ୍ୱରଙ୍କ ବଡସିଂହାର ବେଶ ଓ ବଡଓଷା ଥିବାରୁ ରାତିରୁ ଶ୍ରଦ୍ଧାଳୁଙ୍କ ଆଗମନ ଅହେତୁକ ସଂଖ୍ୟାରେ ବୃଦ୍ଧି ପାଇଥିଲା। ସକାଳୁ ମଧ୍ୟ ବିଭିନ୍ନ ପ୍ରାନ୍ତରୁ ଶ୍ରଦ୍ଧାଳୁମାନେ ପ୍ରଭୁଙ୍କୁ ଦର୍ଶନ ଓ ଗଜଭୋଗ ପାଇଁ ସମାଗମ ହେବା ଫଳରେ ପୀଠ ଭକ୍ତାରଣ୍ୟ ହୋଇପଡିଥିଲା। ସନ୍ଧ୍ୟା ପର୍ଯ୍ୟନ୍ତ ଭିଡ ଲାଗି ରହିଥିଲା। ପ୍ରଭୁଙ୍କୁ ଦର୍ଶନ ପାଇଁ ଅଢେଇଘଣ୍ଟା ପର୍ଯ୍ୟନ୍ତ ଧାଡିରେ ରହି ଧର୍ଯ୍ୟର ସହ ଶ୍ରଦ୍ଧାଳୁ ପ୍ରଭୁଙ୍କୁ ଦର୍ଶନ କରି ଥିବା ଦେଖାଯାଇଥିଲା । ରାତି ୨ଟାରେ ନୀତିକାଳିଆ ଶିଶିର ପତ୍ରୀ ପହଡ ଖୋଲି ମଙ୍ଗଳଆଳତୀ, ଧୂପ ଓ ୧୦୮ ଗରାରେ ସ୍ନାନ ଆଦି ନୀତିକାନ୍ତି ସମାପନ ପରେ ବାଳଭୋଗ, ସିଙ୍କୁଢି ଭୋଗ ପରେ ପ୍ରଭୁଙ୍କ କମନୀୟ ହରିହର ବେଶ ଅନୁଷ୍ଠିତ ହୋଇଥିଲା । ରାତି ୩ଟାରେ ଶ୍ରଦ୍ଧାଳୁଙ୍କ ଉଦ୍ଦେଶ୍ୟରେ ଦର୍ଶନ ବ୍ୟବସ୍ଥା କରାଯାଇଥିଲା । ଭିଡ ଏତେ ଅସମ୍ଭାଳ ହୋଇଥିଲା ଯେ ଜିଲ୍ଲା ଆରକ୍ଷୀ ଅଧିକ୍ଷକ ପ୍ରତୀକ ସିଂ ଓ ବରିଷ୍ଠ ପୁଲିସ ଅଧିକାରୀମାନେ ଦିନତମାମ ପୀଠରେ ରହି ନିୟନ୍ତ୍ରଣ କରିଥିଲେ । ପ୍ରଶାସନ ପକ୍ଷରୁ ଗତକାଲି ରାତ୍ରିଯାପନ କରିଥିବା ଶ୍ରଦ୍ଧାଳୁମାନଙ୍କ ଉଦ୍ଦେଶ୍ୟରେ କଳାକାରମାନଙ୍କ ଦ୍ୱାରା ଆଧ୍ୟାତ୍ମିକ କାର୍ଯ୍ୟକ୍ରମ ପ୍ରଦର୍ଶିତ କରାଯାଇଥିଲା ।
