ସୁଆଣ୍ଡୋ ; ମଣିଷର ଚିନ୍ତା ଚେତନା କୁ କଳନା କରିବା ସହଜ ନୁହେଁ । ସେ ନିଜେ କିଛି ନୂଆ କରିବାକୁ ସବୁବେଳେ ଚାହିଁଥାଏ । ତେବେ ସବୁ ଲୋକ ଏଥିରେ ସଫଳତା ପାଇ ପାରିନଥାନ୍ତି । କିଛି ପ୍ରତିଭାବାନ ବ୍ୟକ୍ତି ଏପରି କାମ କରିଥାନ୍ତି ଯାହା ଜନାଦୃତ ହୋଇଥାଏ । ସେହିପରି ସଫଳତା ପାଇଥିବା ଜଣେ ମହିଳାଙ୍କ କୃତି ସମ୍ପର୍କରେ ଜଣାପଡିଛି । ସେ ହେଉଛନ୍ତି ବାଲେଶ୍ୱର ଜିଲ୍ଲା ରେମୁଣା ଥାନା ଅନ୍ତର୍ଗତ କୁତିଆ ଗ୍ରାମର ଉର୍ମିଳା ଦେହୁରୀ (୬୦), ସ୍ୱାମୀ ହରେକୃଷ୍ଣ ଦେହୁରୀ ।
ଉର୍ମିଳା ନିଜେ ମାଟିରେ ଶଙ୍ଖ ତିଆରି କରିବା ଲକ୍ଷ୍ୟନେଇ କାମ ଆରମ୍ଭ କରିଥିଲେ । ଦୀର୍ଘ ଛଅମାସର ପରିଶ୍ରମର ଫଳ ସ୍ୱରୂପ ଆଜି ମାଟିରେ ଶଙ୍ଖ ତିଆରି କରି ରାଜ୍ୟରେ ଚର୍ଚ୍ଚିତ ହୋଇପାରିଛନ୍ତି । ସେ ଏହାକୁ କଞ୍ଚା ମାଟିରେ ଗଢି ସାରିବା ପରେ ତାକୁ ଭାଟିରେ ପୋଡିଥାନ୍ତି । ଯାହାକି ତାହା ଦୀର୍ଘଦିନ ରହି ପାରିବ । ପ୍ରାକୃତିକ ଶଙ୍ଖର ଅବିକଳ ଧ୍ୱନୀ ଏହି ମାଟି ରେ ନିର୍ମିତ ଶଙ୍ଖରେ ଶୁଭୁଛି । ଶ୍ରୀମତୀ ଦେହୁରୀଙ୍କ ସଫଳତା ଓ କୃତିତ୍ୱରେ ଖୁସି ହୋଇ ଭୁବନେଶ୍ୱରର ହେଲପ ଲାଇନ ଫାଉଣ୍ଡେସନ ତରଫରୁ ବୁଧବାର ଦିନ ତାଙ୍କୁ କୋଡ଼ିଏ ହଜାର ଟଙ୍କାର ଚେକ୍ ତାଙ୍କ ବାସଭନରେ ପ୍ରଦାନ କରାଯାଇଛି ।
