ବିଶାଖାପାଟଣା: ଆନ୍ଧ୍ରପ୍ରଦେଶର ବିଶାଖାପାଟଣା ଅନ୍ତର୍ଗତ ପରୱାଡ଼ା ଫାର୍ମା ସହରରେ ଥିବା ସାନୋର ଲାଇଫ ସାଇନ୍ସ ନାମକ ଏକ ଫାର୍ମା କମ୍ପାନୀ କାରଖାନାରେ ଗ୍ୟାସ ଲିକ୍ ଯୋଗୁ ୨ ଜଣଙ୍କ ମୃତ୍ୟୁ ଘଟିଛି। ଏଥିରେ ଅନ୍ୟ ୪ ଜଣ କର୍ମଚାରୀ ଗୁରୁତର ଭାବେ ଅସୁସ୍ଥ ହୋଇପଡ଼ିଛନ୍ତି। ସେମାନଙ୍କୁ ଏକ ଘରୋଇ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି। ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀ ଏହି ଘଟଣାର ତଦନ୍ତ ନିର୍ଦେଶ ଦେବା ସହିତ ଉକ୍ତ କାରଖାନାକୁ ନିଲ୍ କରିବାକୁ ନିର୍ଦେଶ ଦେଇଛନ୍ତି।
ସୋମବାର ବିଳମ୍ବିତ ରାତିରେ ଏହି ଅଘଟଣ ଘଟିଥିବା ସୂଚନା ମିଳିଛି। ଘଟଣା ସମୟରେ ୩୦ କର୍ମଚାରୀ କାରଖାନାରେ ଉପସ୍ଥିତ ଥିଲେ। ପରୱାଡ଼ା ଥାନା ଅଧିକାରୀ ଉଦୟ କୁମାର କହିଛନ୍ତି ଯେ, ଘଟଣାରେ ଦୁଇ ଜଣଙ୍କର ମୃତ୍ୟୁ ଘଟିଛି। ୪ ଜଣଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି। ବର୍ତ୍ତମାନ ସ୍ଥିତି ନିୟନ୍ତ୍ରଣରେ ରହିଛି। ପ୍ରାଣ ହରାଇଥିବା ୨ ବ୍ୟକ୍ତି କାରଖାନାରେ ଶ୍ରମିକ ଭାବେ କାମ କରୁଥିଲେ ଏବଂ ସେମାନେ ଲିକ୍ ସ୍ଥାନରେ ଉପସ୍ଥିତ ଥିଲେ।
ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ, ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀ ସାନୋର ଲାଇଫ ସାଇନ୍ସ ଫାର୍ମା କମ୍ପାନୀରେ ହୋଇଥିବା ଗ୍ୟାସ୍ ଲିକ୍ ଘଟଣା ସମ୍ପର୍କରେ ଅବଗତ ହେବା ପରେ ଏହାର ତଦନ୍ତ ନିର୍ଦେଶ ଦେଇଛନ୍ତି। ସୋମବାର ରାତି ସାଢ଼େ ୧୧ଟାରେ ଗ୍ୟାସ୍ ଲିକ୍ ହୋଇଛି। କମ୍ପାନୀର କାରଖାନାକୁ ତତ୍କାଳ ବନ୍ଦ କରିଦିଆଯାଇଛି।
