ଟୋକିଓ: ଜାପାନର କ୍ୟୋଟୋ ସହରରେ ଥିବା ଏକ ପ୍ରତିଷ୍ଠିତ ଆନିମେଶନ ଷ୍ଟୁଡିଓରେ କେହି ଦୁର୍ବୃତ୍ତ ଗୁରୁବାର ସକାଳେ ନିଆଁ ଲଗାଇଦେବାରୁ ୧୨ ଜଣଙ୍କ ମୃତ୍ୟୁ ଘଟିଛି। ଏଥିରେ ୩୦ରୁ ଅଧିକ ଆହତ ହୋଇଛନ୍ତି। ଜଣେ ଦୁର୍ବୃତ୍ତ ଷ୍ଟୁଡିଓରେ ପଶି କିଛି ତରଳ ପଦାର୍ଥା ପକାଇ ନିଆଁ ଲଗାଇ ଦେଇଥିଲେ। କ୍ଷଣିକ ମଧ୍ୟରେ ଷ୍ଟୁଡିଓ ଚାଲିଥିବା କୋଠାରେ ନିଆଁ ବ୍ୟାପିଯାଇଥିଲା। ଖବର ପାଇ ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିବାକୁ ଉଦ୍ୟମ ଜାରି ରଖିଛନ୍ତି।
ରିପୋର୍ଟ ଅନୁସାରେ ଗୁରୁବାର ସକାଳ ସାଢ଼େ ୧୦ଟା ବେଳେ ଏହି ଘଟଣା ଘଟିଛି। ଯେଉଁ ବ୍ୟକ୍ତି ନିଆଁ ଲାଗଇଛନ୍ତି ସେ ବି ଆହତ ହୋଇଛନ୍ତି। ସମସ୍ତ ଆହତଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ ୩ମହଲା ବିଶିଷ୍ଟ ଏହି କୋଠା ଭିତରେ ବାରମ୍ବାର ବିସ୍ଫୋରଣର ଶବ୍ଧ ଶୁଣିବାକୁ ମିଳିଥିଲା। ପରେ ସେଠାରୁ ବହୁ ମାତ୍ରାରେ କଳା ଧୂଆଁ ବାହାରିଥିଲା। ଅଗ୍ନିଶମ କର୍ମଚାରୀ ପହଞ୍ଚି ଲୋକଙ୍କୁ କମ୍ବଳରେ ଘୋଡ଼ାଇ ବାହାରକୁ ଆଣୁଥିବା ଦେଖିବାକୁ ମିଳିଥିଲା।
ସୂଚନାଯୋଗ୍ୟ, ଜାପାନର ପ୍ରସିଦ୍ଧ ଆନିମେଶନ ସିରିଜ କେ-ଆନ, ସୁଜୁମିୟା ହରୁହୀ, ଏ ସାଇଲେଣ୍ଟ ଭଏସ ସମେତ ଅନେକ ବଡ଼ ବଡ଼ ଆନିମେଶନ ଫିଲ୍ମ ଏବଂ ସିରିଜ ଏହି ଷ୍ଟୁଡିଓ ଦ୍ବାରା ନିର୍ମାଣ କରାଯାଇଛି।
