ନୂଆଦିଲ୍ଲୀ: ସାଧାରଣ ବର୍ଗର ଗରିବ ଛାତ୍ରଛାତ୍ରୀଙ୍କୁ ଶିକ୍ଷା ଓ ସରକାରୀ ଚାକିରିରେ ୧୦% ସଂରକ୍ଷଣ ପ୍ରସ୍ତାବ ସଂସଦରେ ଅନୁମୋଦନ ଲାଭ କରିଛି। ଏହାପରେ ଦେଶର ପ୍ରତି ବିପିଏଲ୍ ପରିବାରକୁ ମାସିକ ଭତ୍ତା ଦେବାକୁ କେନ୍ଦ୍ର ସରକାର ଚିନ୍ତା କରୁଥିବା ଜଣାପଡ଼ିଛି।
କେନ୍ଦ୍ର ସରକାରଙ୍କ ପ୍ରସ୍ତାବ ଯଦି କାର୍ଯ୍ୟକାରୀ ହୁଏ ତେବେ ଦେଶର ପ୍ରତି ବିପିଏଲ୍ ପରିବାରକୁ ମାସକୁ ୨୫୦୦ ଟଙ୍କା ମିଳିବ। ଏହି ଅର୍ଥ ସେମାନଙ୍କ ଆକାଉଣ୍ଟରେ ସିଧାସଳଖ ଜମା ହେବ। ବଦଳରେ ଖାଦ୍ୟ, ଗ୍ୟାସ୍ ଓ ଅନ୍ୟାନ୍ୟ ସରକାରୀ ସବ୍ସିଡି ବାବଦରେ ସେମାନେ ପାଉଥିବା ରାଶି ବନ୍ଦ କରାଯିବ। ତେବେ ପ୍ରତି ପରିବାର ପିଛା ଭତ୍ତା ପରିମାଣ କେତେ ହେବ ତାହା ଭାରତୀୟ ରିଜର୍ଭ ବ୍ୟାଙ୍କର ପାଣ୍ଠି ହସ୍ତାନ୍ତର ନିଷ୍ପତ୍ତି ଉପରେ ନିର୍ଭର କରୁଛି। ଯଦି ଏହି ଯୋଜନା କାର୍ଯ୍ୟକାରୀ ହୁଏ ତେବେ କେନ୍ଦ୍ର ସରକାରଙ୍କ ଉପରେ ବାର୍ଷିକ ୩୨ ହଜାର କୋଟି ଟଙ୍କାର ଆର୍ଥିକ ବୋଝ ପଡ଼ିବ ବୋଲି ଆକଳନ କରାଯାଇଛି। ଦେଶର ସାଧାରଣ ନିର୍ବାଚନକୁ ଆଉ ମାତ୍ର ୧୦୦ ଦିନରୁ କମ୍ ସମୟ ରହିଥିବାରୁ ଆଗାମୀ ବଜେଟ୍ରେ ଏହି ବ୍ୟୟ ବରାଦ ସ୍ଥାନ ପାଇପାରେ ବୋଲି ଚର୍ଚ୍ଚା ହେଉଛି।
୨୦୧୬-୧୭ ଅର୍ଥନୈତିକ ସର୍ବେକ୍ଷଣ ରିପୋର୍ଟରେ ଗୁରୁତ୍ୱାରୋପ କରାଯାଇଥିବା ୟୁବିଆଇ(ୟୁନିଭର୍ସାଲ୍ ବେସିକ୍ ଇନକମ୍) ଆଧାରରେ କେନ୍ଦ୍ର ସରକାର ଉପରୋକ୍ତ ପଦକ୍ଷେପ ନେବାକୁ ଚିନ୍ତା କରୁଥିବା ଜଣାପଡ଼ିଛି। ସୂଚନାଯୋଗ୍ୟ, ରାଜସ୍ଥାନ ବିଧାନସଭା ନିର୍ବାଚନରେ ମଧ୍ୟ ବିଜେପି ଇସ୍ତାହାରରେ ଏହି ପ୍ରସ୍ତାବ ସ୍ଥାନ ପାଇଥିଲା। ସେହିପରି ଦେଶର ମୋଟ ଜନସଂଖ୍ୟାର ୪୭% କୃଷକ ପରିବାର ପାଇଁ ତେଲେଙ୍ଗାନା ସରକାରଙ୍କ ‘ରାଇତୁ ବନ୍ଧୁ’ ଯୋଜନା କାର୍ଯ୍ୟକାରୀ କରିବାକୁ କେନ୍ଦ୍ର ସରକାର ଚିନ୍ତା କରୁଛନ୍ତି। ‘ରାଇତୁ ବନ୍ଧୁ’ ଯୋଜନାରେ ଏକ ଏକରୁ କମ୍ ଚାଷ ଜମି ଥିବା କୃଷକଙ୍କୁ ଏକର ପିଛା ୪ ହଜାର ଟଙ୍କା ହିସାବରେ ପ୍ରତି ଅମଳ ଋତୁ ପାଇଁ ପ୍ରଦାନ କରାଯାଉଛି।
ବିପିଏଲ୍ ପରିବାରକୁ ମିଳିବ ମାସିକ ଭତ୍ତା!
Popular Categories
Previous article
Next article