ପୁଣି ଚାଷୀ ଆତ୍ମହତ୍ୟା ଅଭିଯୋଗ

ଟିଟିଲାଗଡ: ପୁଣି ଜଣେ ଆଦିବାସୀ ଚାଷୀ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ମୃତକ ହେଲା ଟିଟିଲାଗଡ ବ୍ଲକ ଅନ୍ତର୍ଗତ ଦୋର୍ଲୋ ଗ୍ରାମ ଘାସିରାମ ମାଝୀ। ମିଳିଥିବା ସୂଚନା ଅନୁଯାୟୀ, ଚାଷ କାର୍ଯ୍ୟ ପାଇଁ ଘାସିରାମ ମାଝୀ ମାଇକ୍ରୋଫାଇନାନ୍ସ କମ୍ପାନୀରୁ ୠଣ ନେଇଥିଲେ। ପରେ ଫସଲ ନଷ୍ଟ ହେବାରୁ ସେ ଋଣ ସୁଝି ପାରିନଥିଲେ। ଫଳରେ ଋଣ ଭାରରେ ଅତିଷ୍ଠ ହୋଇ ଘାସିରାମ ମାଝୀ ଆତ୍ମହତ୍ୟା କରିଥିବା ପରିବାର ଲୋକ ଅଭିଯୋଗ କରିଛନ୍ତି। ଏଭଳି ପରିସ୍ଥିତିରେ ମୃତକଙ୍କ ପରିବାର ଓ ଋଣ ବୋଝକୁ ନେଇ ଅତିଷ୍ଠ ଥିବା ଗ୍ରାମର ଶତାଧିକ ମହିଳା ଶୁକ୍ରବାର ଟିଟିଲାଗଡ ଉପଜିଲ୍ଲାପାଳ ସୁଧାକର ନାୟକଙ୍କ ଦ୍ବାରସ୍ଥ ହୋଇଛନ୍ତି।

ସୂଚନାଯୋଗ୍ୟ, ଗତ ୧୬ରେ ଘାସିରାମ ମାଝୀ ଆତ୍ମହତ୍ୟା କରିଥିଲେ। ଗ୍ରାମରେ ଏକ ଗଛରେ ଝୁଲୁଥିବା ଅବସ୍ଥାରେ ତାଙ୍କ ମୃତଦେହ ଉଦ୍ଧାର କରାଯାଇଥିଲା।